Retteý isi ilgerileý ústinde

Keshe Tabıǵı monopolııalardy retteý agenttiginde Premer-Mınıstrdiń orynbasary – Qarjy mınıstri Baqyt Sultanovtyń qatysýymen vedomstvonyń keńeıtilgen alqa otyrysy ótti. Onda negizgi baıandamany agenttik basshysy Murat Ospanov jasady. «Ekonomıkanyń monopolııalyq sektoryn memlekettik retteý­ júıe­siniń tıimdi jumysy, ınves­tısııalyq tartymdylyq máse­le­lerin sheshý, tutynýshylar qu­qyq­taryn qorǵaý men «jasyl» ekonomıkaǵa kóshý agenttik qyz­me­tiniń negizgi strategııalyq ba­ǵy­ty bolyp tabylady. Búginde eli­miz álemniń damyǵan 30 eliniń qataryna kirýge daıyndalýda. Al bul jańǵyrtýsyz, jaqsy jeli­ler­siz jáne ınfraqurylymsyz múm­kin emes. Memleket basshysy «Qazaqstan-2050» Strategııasy men Qazaqstan halqyna Joldaýyn­da qoıǵan el damýynyń jańa min­detteri ekonomıkanyń tıim­di ınfraqurylymyn qurý, tutyný­shy­lar quqyqtaryn qorǵaý jáne tarıftik saıasat tetigin jetildirý úshin jaǵdaılar jasaýdy talap etedi», dedi Tabıǵı monopolııalardy retteý agenttiginiń tóraǵasy M.Ospanov. Qazirgi tańda agenttik ınfra­qurylymdyq retteýshi retinde 1186 tabıǵı monopolııa sýbektisi qyzmetine tarıftik jáne tehnı­ka­lyq retteýdi júzege asyrady. Tarıfter zańnama talaptaryna sáıkes bekitiledi. 2012 jyly monopolıster suraǵan kirister 55 mlrd. teńgege tómendetilse, 2013 jyly olardyń suranysy 175 mlrd.-tan astam teńgege qysqartylǵan. Shaǵyn jáne orta bıznes úshin kedergiler tómendetilgen. Birqatar shaǵyn monopolıster tarıfterdi ózgertýdiń habarlama berý nusqasyna kóshirilip, normatıvtik bazaǵa ońtaılandyrý júrgizilgen. Sondaı-aq, ozyq elderdiń tájirıbesi boıynsha kezeń-kezeńmen yntalandyryp retteý engizilýde. Elektr energetıkasy salasynda ótken jyldan bastap óńirlik elektr jelilik kompanııalar úshin benchmarkıng ádisimen tarıfter belgilengen. Sýmen jabdyqtaý salasynda problemalardy sheshý boıynsha jumystar júrgizilgen. Keń aýqymdy jańǵyrtý men rekonstrýksııalaý úshin sýǵa tarıf belgileýdiń jańa tetikterin engizýdiń 2013-2015 jyldarǵa arnalǵan keshendi jos­pary qabyldanyp, iske asyrylýda. Sonymen birge, agenttik jylý jelilerin jańǵyrtý boıynsha keshendi josparyn da ázirleýde. Atalǵan jospar maquldanyp, iske asyrylǵan jaǵdaıda 2020 jylǵa deıin tozýdyń 15 paıyzǵa, al ysyraptar deńgeıiniń 4 paıyzǵa tómendeýi josparlanǵan. Investısııalyq tartym­dy­lyq­ty kóterý jónindegi jumystyń nátıjesi ınvestısııalarǵa oń serpin berip otyr. 2013 jyldyń qorytyndysy boıynsha ınvestısııalar somasy shamamen 230 mlrd. teńgeni qurasa, bul ótken kezeńnen 10 paıyzǵa artyq. Búgingi kúni 92 tabıǵı monopolııa sýbektisi shekti tarıftermen jumys isteıdi. Bul tutynýshylar úshin tarıfterdiń turaqtylyǵy men boljaldylyǵyn, sonymen qatar, qyzmetter sapasyn kóterýdi qamtamasyz etpek. Memleket basshysynyń tapsyrmasyn oryndaý úshin balamaly tetikti engizýdi, sondaı-aq, úıge ortaq jylýdy esepteý aspaptaryn bıýdjet esebinen ornatý sharalaryn qarjylandyrýdy eskere otyryp, jyl sońyna deıin turǵyn úılerdi jylý energııasyn esepteý aspaptarymen júz paıyz jaraqtandyrý josparlanǵan. Alqa otyrysyn qorytyndyla­ǵan Premer-Mınıstrdiń orynbasary – Qarjy mınıstri Ba­qyt Sultanov Elbasy N.Á.Nazar­baev­tyń «Qazaqstan joly – 2050: bir maq­sat, bir múdde, bir bolashaq» atty Joldaýynda halyqty áleý­mettik qorǵaý mindetine basa nazar aýdarylǵanyn atap ótti. Sondaı-aq, ol osy tapsyrmanyń aıasynda agenttik óz qyzmetin júzege asyrǵan kezde, eń aldymen, tutynýshy men monopolıst múddeleriniń teńgerimin qamtamasyz etetin monopolııalyq sektordyń memlekettik retteý júıesin damytýy tıis degendi de nazardan tys qaldyrmady. Ábdirahman QYDYRBEK, «Egemen Qazaqstan».