Búgin aıaqtalatyn eki kúndik forým onlaın formatta uıymdastyrylǵan. Is-sharanyń saltanatty ashylýyna Premer-Mınıstrdiń orynbasary Roman Sklıar qatysyp, Memleket basshysy Qasym-Jomart Toqaevtyń quttyqtaý hatyn oqyp berdi. Quttyqtaý hatta aıtylǵandaı, forým memleket pen bıznestiń tájirıbe almasar alańyna, otandyq mashına jasaý salasyndaǵy ózekti máseleleri sheshiletin ortaǵa aınalǵan.
«Pandemııaǵa qaramastan, otandyq mashına jasaýshylar – ekonomıkalyq kórsetkishter boıynsha kóshbasshylar qatarynda. Sala kórsetkishi 24 paıyzǵa artty. Bul – óńdeýshi ónerkásip sektorynyń damýyna qosylǵan eleýli úles. Indýstrııalandyrýdyń alǵashqy on jylynda óńdeý ónerkásibiniń ekonomıkanyń damýyna qosqan áseri taý-ken óndirý salasynyń úlesinen asyp tústi. Qazaqstandyq mashına jasaýshylar qoıylǵan mindetterdi laıyqty oryndaýda. Shyǵarylatyn buıymdar nomenklatýrasyn keńeıtip, jańa tehnologııalyq ázirlemelerdi engizýde. Jalpy, eldegi ekonomıkalyq ózgerister kóshbasshylarynyń qatarynda keledi», delingen Prezıdenttiń quttyqtaý hatynda.
Qasym-Jomart Toqaev memlekettiń mashına jasaý salasynyń suranysqa ıe jobalaryn árdaıym qoldap kele jatqanyn, aldaǵy ýaqytta da qoldaı beretindigin aıtty.
«Joldaýda men 2025 jylǵa qaraı óńdeý ónerkásibiniń eksportyn 24 mlrd dollarǵa deıin jáne eńbek ónimdiligin 30 paıyzǵa ulǵaıtý mindetin qoıdym. Bul úshin memleket «О́nerkásiptik saıasat týraly» zań qabyldap, otandyq ónerkásiptik kásiporyndardy barynsha qoljetimdi shıkizatpen qamtamasyz etý tetigin bekitedi. Otandyq agroónerkásiptik jáne ónerkásiptik saıasat ushtastyrylady. Qazaqstannyń mashına jasaý salasy ekonomıkalyq ósimniń, jumyspen qamtý men eksporttyń qozǵaýshy kúshine aınalatynyna senimdimin», delingen quttyqtaý hatta.
Forým uıymdastyrylyp kele jatqan jyldar ishinde ózin ındýstrııadaǵy basty salalyq oqıǵa retinde tanytty ári kooperasııalyq baılanystardy damytý úshin biregeı platforma bolyp sanalady. Forým sheńberinde Mashına jasaýdy damytýdyń 2019-2024 jyldarǵa arnalǵan jol kartasyn iske asyrý barysy týraly paneldik pikirtalastar, mashına jasaý salasy úshin kadrlar daıarlaý, mashına jasaýdyń basym kishi salalary boıynsha seksııalyq otyrystar, halyqaralyq munaı-gaz operatorlarymen, qatty paıdaly qazbalardy jer qoınaýyn paıdalanýshylarmen satyp alý jáne jergilikti qamtýdy damytý taqyrybynda dóńgelek ústelder ótkizý josparlanyp otyr.
Indýstrııa jáne ınfraqurylymdyq damý vıse-mınıstri Marat Qarabaev óz sózinde ındýstrııalandyrý baǵdarlamasyn iske asyrý jyldarynda mashına jasaý salasy eń joǵary, 4 ese ósimdi kórsetkenin atap ótti. Indýstrııalandyrý kartasy jáne óńirlerdiń kásipkerligin qoldaý kartalary sheńberinde 470 mlrd teńgege 150-den astam joba iske qosylǵan. 16 myńǵa jýyq jumys orny quryldy. Búgingi tańda salada 3 myńnan astam kásiporyn jumys isteıdi. Olarda 120 myńǵa jýyq adam eńbek etedi.
– Mashına jasaý salalary arasynda eń joǵary ósý dınamıkasyn avtomobıl jasaý salasy kórsetip otyr. Indýstrııalandyrý jyldarynda alǵash ret qazaqstandyq avtoónerkásiptiń ónimderi eksporttyq naryqtarǵa shyqty. Al el ishinde satylǵan árbir ekinshi jańa jeńil avtokólik – otandyq óndiristiń ónimi. Búgingi tańda Qazaqstanda kólik quraldary men aýyl sharýashylyǵy tehnıkasy úshin belgili bir komponentter óndirisi jolǵa qoıylǵan, – dedi M.Qarabaev.
Mashına jasaý salasyndaǵy ósý serpinin saqtaý jáne pandemııaǵa baılanysty qalyptasqan turaqsyzdyq jaǵdaıynda kásiporyndardyń quzyretterin ósirý ońaı emes. Soǵan qaramastan, ınvestısııalardy, kásiporyndardy iske qosý serpinin jáne tehnologııalyq jańartýdy eskere otyryp, jaqyn ýaqytta belsendi ósý, damý, ımporttyq ónimdi almastyrý, sondaı-aq eksport kólemin ulǵaıtý kútilýde. Máselen, bıyl quny 79,6 mlrd teńge bolatyn, 2 myń jańa turaqty jumys ornyn qurýǵa múmkindik beretin 14 jobany iske qosý josparlanýda.
