Tusaýkeser básekesinde Italııanyń myqty oıynshysy, álemniń burynǵy 18-raketkasy Andreas Seppıdi san soqtyryp, jergilikti jankúıerlerdi qýantqan jerlesimiz keshe Ilıa Ivashkomen kezdesti. 27 jastaǵy Belarýs ókili bul kúnderi ATR reıtınginde 52-orynda tur. Bıyl ol Ýımbldonnyń tórtinshi kezeńine deıin jetse, AQSh-tyń ashyq birinshiliginiń úshinshi aınalymynda óner kórsetti. Bul kezdesýde Ivashkonyń sheberlik deńgeıi Skatovtan bir bas joǵary ekeni anyq baıqaldy. Báseke 6:2, 6:3 esebimen belorýssııalyq tennısshiniń paıdasyna sheshildi. Osylaısha, ol Astana Open dodasyna qatysýshylar arasynda alǵashqy bolyp shırek fınalǵa joldama aldy.
Dmıtrıı Popko men aýstralııalyq Djon Mıllmannyń arasyndaǵy básekede otandasymyz osaldyq tanytty – 6:3, 1:6, 4:6. Keshe keshkisin Mıhaıl Kýkýshkın jasyl qurlyqtyń taǵy bir ókili Djeıms Dakvordpen kúsh synasty. Búgin Aleksandr Býblık serbııalyq Mıomır Kesmanovıchpen saıysqa túsedi. Endi osy eki jerlesimizden jeńis kútemiz. Kýkýshkın de, Býblık te ATR dodalary men «Úlken dýlyǵa» sanatyndaǵy týrnırlerge úzdiksiz qatysyp kele jatqan saqa sportshylar.
Esterińizge sala keteıik, Astana Open týrnıri 26 qyrkúıekke deıin jalǵasady. Álemdik korttarda biraz bedel jınaǵan oıynshylardyń basyn qosyp otyrǵan aıtýly jarystyń júlde qory bıylǵy jyly 480 myń AQSh dollaryn quraıdy.
Nur-Sultandaǵy týrnırden bólek, taǵy birneshe jerlesimiz túrli básekede baq synaýda. Atap aıtsaq, Chehııanyń Ostrava qalasyndaǵy WTA dodasynyń tusaýkeser kezdesýinde Elena Rybakına reseılik Veronıka Kýdermetovany 6:1, 6:3 esebimen qapy qaldyrdy. Iýlııa Pýtınseva asa shıelenisti ótken oıynda qytaılyq Chjan Shýaıdy shań qaptyrdy – 5:7, 7:6, 6:4. Bul báseke 3 saǵat 24 mınýtqa sozyldy. Ekinshi kezeńde Rybakına polshalyq Magda Lınetpen jolyqsa, Pýtınseva da atalǵan memlekettiń ókili Iga Sventekpen saıysqa túsedi.
