Pavlodar oblysynyń turǵyny Qaraǵandynyń mańynda eńbek quldyǵyna ustalǵany týraly habarlap, beıneótinish jazdy. Er adam jumys berýshisi atqarǵan jumysy úshin oǵan aqy tólemeı, tipti, ony mezgil-mezgil uryp-soǵyp otyratynyna shaǵymdanady.
«Tamyz aıynda men Maratqa jumysqa turdym. Jelezın aýdanyna baryp, onda bir nysandy óńdedik. Ol eńbekaqymdy tólemedi. Jalaqymdy suraǵan kezde, ol meni uryp-soqty. Sodan keıin Qaraǵandydaǵy ekinshi nysanǵa bardyq. Onda jumys istep, jalaqymdy taǵy suradym. Ol meni taǵy urdy. 21-shi qyrkúıekte túski ýaqytta nysannan qashyp kettim. Marat meniń uıaly telefonymdy, qujattarym men jeke zattarymdy alyp qoıdy. O bastan brıgada quramynda 6 adam boldy. Qazir ekeýi qaldy, onyń bireýi - Qyrǵyzstan azamaty. Meniń jalaqymdy tóleýge kómektesýdi jáne ony uryp-soǵý faktisi boıynsha jaýapqa tartýdy suraımyn», deıdi er adam.
Qaraǵandy oblysynyń polısııa departamenti bul istiń mán-jaıyn anyqtap jatqanyn túsindirdi.
«Áleýmettik jelilerge monıtorıng júrgizý barysynda er adamǵa atqarylǵan jumys úshin aqsha tólemeý jáne jumys berýshi tarapynan uryp-soǵý faktisi boıynsha beıneótinish joldandy. Atalǵan fakti Qaraǵandy qalasynyń polısııa basqarmasynda tirkeldi. Polısııa qyzmetkerleri vıdeo avtorynyń – Pavlodar oblysynyń 41 jastaǵy turǵynynyń jeke basyn anyqtady. Qazirgi ýaqytta onyń ornalasqan jeri anyqtalýda», dep habarlady vedomstvonyń baspasóz qyzmeti.
