Irannyń myqty qarsylas ekenine eshkimniń de kúmáni joq. Olar osy kúnge deıin 15 márte jalaýy jelbiregen Azııa chempıonatynda 12 ret bas júldeni oljalady. Tek úsh jarysta altyn tuǵyrdy Japonııa quramasyna bosatty. Sonymen qatar, ırandyqtar álem chempıonatynda júlde alýǵa kúsh-jigeri jetken sary qurlyqtaǵy jalǵyz komanda.
Parsy eliniń ókilderi 2016 jyly Kolýmbııada ótken dúnıejúzilik dodada qola medaldi moıyndaryna ildi. Tarqatyp aıtsaq, toptyq týrnırde Ispanııadan (1:5) utylyp, Marokkony (5:3) utty. Ázerbaıjanǵa (3:3) qarsy matchta teń esep tirkeldi. 1/8 fınalda dańqty Brazılııa quramasynyń (4:4, penaltıden 2:3 ) ózin jolynan yǵystyrdy. Shırek fınalda Paragvaıdy (4:3) qapy qaldyryp, jartylaı fınalda Reseıge (3:4) ese jiberdi. Al qola medal úshin saıysta Portýgalııany (2:2, penaltıden – 4:3) jeńdi. Sondaı-aq, ırandyqtardyń 1992 jyly da jeńis tuǵyryna kóterilýge múmkindigi boldy. Alaıda úshinshi oryn úshin tartysta Ispanııaǵa (6:9) ese jiberip, úzdikter qataryna qosyla almady.
Túrli baıraqty básekelerde Qazaqstan men Iran fýtzalshylarynyń joldary birneshe márte qıysty. Eń mańyzdy básekelerge toqtalatyn bolsaq, 1996 jyly Ispanııadaǵy álem chempıonatynyń irikteý týrnırinde otandastarymyzdyń tas-talqanymyzdy shyǵardy – 14:2. 2000 jyly Taılandta jalaýy jelbiregen Azııa birinshiliginiń aqtyq synynda taǵy da utyldyq – 1:4. 2016 jyly Taı elinde uıymdastyrylǵan halyqaralyq týrnırde qos komanda teń tarasty – 3:3. 2017 jyly óz jerinde ótken jarysta alań ıeleri bir dop aıyrmashylyǵymen jeńiske jetti – 2:1. Bir sózben aıtsaq, osy kúnge deıin bizdiń fýtzalshylardyń ırandyqtarǵa áli jetpegen eken.
Kaýnastaǵy matchty Iran quramasy qarqyndy bastady. 8-mınýtta Moslem Oladgobad pen 15-mınýtta Ahmad Esmaelpýr nysanany dál kózdedi – 0:2. Bul eki shabýyldyń óte jyldam uıymdastyrylǵany sonshalyq, qorǵaýshylarymyz ne bolǵanyn túsinbeı de qaldy. Tipten, asa epti degen Igıtanyń ózi qaýiptiń betin qaıtara almady. Osy oraıda, bizdiń komandanyń da esepti ózgertýge jaqsy múmkindigi bolǵanyn aıta ketken jón. Biraq qatarynan eki gol jiberip alǵannan keıin jigitterdiń saly sýǵa ketti me, áıteýir olardyń sansyz áreketi esh nátıje bermedi. Keıbir sátte jerlesterimizge dáldik jetpedi, keıbir tusta Irannyń qaqpashysy Álıreza Samımı óte keremet oınady. Birinshi kezeńniń ózinde ol segiz birdeı seıv jasady.
Úzilis kezinde Rıkardo Kaka óz shákirtterin qalaı jigerlendirgenin biz bilmeımiz. Bir anyǵy, ekinshi kezeńge qazaqstandyqtar múlde basqa keıipte shyqty. Olar yrǵalyp-jyrǵalyp jatpaı, qarsylastar qaqpasyna birden lap qoıdy. Alys qashyqtyqtan Dýglastyń qańyrata tepken doby birde baǵanaǵa tıse, endi birde mańdaıshany jalap ótti. 25-mınýtta Dáýren Tursaǵulov ońtaıly sátti múlt jibergen joq. Onyń tepken doby Samımıdiń qolyna tıip, qaqpa torynan tabyldy – 1:2. Esep aıyrmashylyǵy qysqarǵannan keıin jankúıerlerdiń de keýdesinde úmit oty mazdady. 29-mınýtta jerlesterimiz aıyp dobyn oryndady. Áriptesinen dop alǵan Arnold Knaýb esh oılanbastan ony qaqpaǵa qaraı baǵyttady – 2:2.
Qolda turǵan jeńisten aıyrylyp qalý qaýipi týyndaǵannan keıin ırandyqtardyń da tizgindi qaıta qolǵa alýǵa tyrysyp baqty. 33-mınýtta olar tarazy basyn teńselýge shaq qaldy. Qarsylastar komandasynyń oıynshylary dál qaqpanyń aldynda turyp, eki birdeı asa qaýipti soqqy jasady. Eki retinde de Igıta minsiz oınady. Kezdesýdiń aıaqtalýyna eki mınýttaı ýaqyt qalǵanda Taınan keremet múmkindikti paıdalana almady. Onyń kesheýildetip tepken dobyn qaqpashy syrtqa qaǵyp jiberdi. Eger ol kibirtiktep qalmaı sál jyldamyraq qımyldaǵanda jaǵdaı múlde basqasha bolatyn edi. «Áttegen-aı» degennen basqa aýzymyzǵa sóz túspedi. Esesine buryshtamadan berilgen dopty jaqsy qabyldaǵan Taınan osy oıyndaǵy jeńis golynyń avtory atandy – 3:2.
Osylaısha, Parsy eliniń órenderinen basym túsken Qazaqstan quramasy álem chempıonatynyń jartylaı fınalynda kúsh synasý qurmetine ıe boldy. Bul jaı ǵana jeńis emes, tarıhı jeńis! Osyny esten shyǵrmaǵan abzal. Onyń ústine, jerlesterimiz keremet kambek jasady! Eki dop aıyrmashylyǵymen jeńilip jatyp, jeńisti qarsylasynyń ýysynan julyp áketti. Osylaısha, óz tarıhymyzda alǵash ret júldeli oryndar úshin talasý múmkindigine ıe boldyq.
Match aıaqtalǵan bette Iranǵa qarsy básekeni tamashalaǵan barsha qazaqstandyq jankúıer Kaka bastaǵan komandaǵa aq alǵysyn jaýdyrdy. Bas bapkerdiń ózi de asa qıyn sátte jigeri jasymaǵan jigitterdiń jankeshtiligine zor rızashylyǵyn bildirip, «Eger men qazaq bolsam, osy komandany árkez maqtan tutar edim» dep aqjarma kóńilin aqtardy. Oǵan biz de qosylamyz. Desek te arqany keńge salýǵa áli erte. Alda – jartylaı fınal. 30-qyrkúıekte azýly Portýgalııa quramasyna qarsy oınaımyz. Olar óz kezeginde dańqty alysqa jaıylǵan Ispanııa fýtzalshylaryn qosymsha ýaqytta 4:2 esebimen utty.
