Onda QR Indýstrııa jáne ınfraqurylymdyq damý mınıstri Beıbit Atamqulov ındýstrııalandyrý kartasynyń iske asyrylý barysy jaıly esep berdi. «2021 jyly óńirler jalpy somasy 1,23 trln teńge bolatyn 128 jobany iske qosýdy josparlap otyr. 12 myń turaqty jumys orny ashylady. Jobalardyń eń kóbi Shymkent qalasynda – 17 joba, Qaraǵandy jáne Shyǵys Qazaqstan oblystarynda - 14 jobadan», degen mınıstr osy óńirlerde oń serpin baıqalǵanyn aıtty.
Indýstrııalandyrý kartasy sheńberinde qalamyzda bıyl 17 jobany iske asyrý josparlanǵan. Onyń sheńberinde 40 mlrd teńge kólemindegi ınvestısııa tartylyp, 758 jańa jumys oryny ashylmaq. Onyń ishinde bıylǵy toǵyz aıda 5 joba iske qosylyp, 385 jańa jumys oryny ashyldy. Tartylǵan ınvestısııa kólemi 12,6 mlrd. teńgeni quraıdy. Jyl sońyna deıin Qazaqstandaǵy biregeı kásiporyn – «KazAlPack» allıýmınıı bankalar óndirisi iske qosylady. 145 jumys ornymen ashylatyn bul jobany iske asyrýǵa 23,4 mlrd teńge ınvestısııa tartylǵan. Jyldyq qýaty 500 mln dana qalbyr bankalar shyǵaratyn kásiporyn elimizdegi shki suranystyń 65 paıyzyn qamtamasyz etpek.
Elimizdiń energetıka mınıstrligi úılestirýshisi bolyp tabylatyn energetıka salasyndaǵy respýblıkalyq ındýstrııalandyrý kartasyna Shymkent qalasynan 1 joba engen. «Shymkent hımııalyq kompanııasy» JShS-niń metıl tret býtıl efıri men propılen óndirisi kásipornyn qurý úshin 25 mlrd teńge ınvestısııa tartylǵan. Kásiporyn 350 adamdy jumyspen qamtyp, jylyna 57 myń tonna ónim shyǵarmaq. Kásiporyn kelesi jyly iske qosylatyn bolady.
Memleket basshysy Qazaqstan halqyna arnaǵan Joldaýynda 2025 jylǵa qaraı óńdeýshi ónerkásip eksportyn 1,5 ese, eńbek ónimdiligin 30 paıyzǵa ulǵaıtý mindetin belgiledi. Indýstrııalandyrý kartasynyń jobalaryn ýaqtyly ári sapaly iske asyrý osy mindetterge qol jetkizýdi qamtamasyz etedi.
