Sýretti túsirgen J.Jumabekov
Májilis Tóraǵasy Nurlan Nyǵmatýlın barlyq qatysýshylarǵa qasıetti qara shańyraq, búkil «Túrki áleminiń rýhanı astanasy» kıeli Túrkistan jerine kelip, mańyzdy jıynǵa qatysqandarǵa shyn júrekten alǵys bildirdi. Sondaı-aq TúrkPA-nyń mereıtoılyq sharalary baýyrlas elder arasyndaǵy saıası, ekonomıkalyq, áleýmettik jáne mádenı baılanystardy parlamenttik deńgeıde odan ári nyǵaıtýǵa arnalǵanyn aıtty.
Palata Spıkeriniń aıtýynsha, «Túrkistan Deklarasııasy» búkil túrki elderiniń Atajurty, rýhanı Astanasy kıeli Túrkistan jerinde qabyldanǵany elder arasyndaǵy dostyqqa, týystyqqa, syılastyqqa jańa serpin beredi.
«Endi múshe elderimizdiń barlyq sala boıynsha yntymaqtastyǵyn nyǵaıtý, uıymnyń halyqaralyq mártebesin kúsheıtý, túrki elder birligin tereńdetý - osynyń barlyǵy aldaǵy bir jyldyń ishinde jumysymyzdyń eń mańyzdy baǵyttary bolady. Muragerlikti saqtap, TúrkPA-ǵa múshe memleketter aıasyn keńeıtýge de basa nazar aýdaratyn bolamyz», dedi Palata Spıkeri.
Osy jıynda alǵash ret elektrondyq saýda, energetıkalyq resýrstardy tıimdi paıdalaný jáne energetıkalyq tıimdilik, kınematografııa máseleleri boıynsha halyqaralyq modeldik zańdar qabyldandy. Májilis Tóraǵasynyń aıtýynsha, osynyń barlyǵy Assambleıa jumysyna jańa serpin beredi.
Palata Tóraǵasy Ázerbaıjannan, Qyrǵyzstannan, Túrkııadan, Majarstannan, О́zbekstannan kelgen áriptesterine, barsha halyqaralyq uıym múshelerine birlesken tabysty jumys úshin alǵys bildirdi.
Is-shara barysynda Ázerbaıjan Respýblıkasy Mıllı Medjlısiniń Tóraıymy Sahıba Gafarova, Qyrǵyz Respýblıkasy Jogorký Keneshiniń Tóraǵasy Talant Mamytov, Túrkııa Respýblıkasy Uly Ulttyq Jınalysynyń Tóraǵasy Mustafa Shentop sóz sóıledi.
Aıta ketý kerek, Túrkistan deklarasııasynyń mańyzdy tarmaqtary Elbasynyń tarıhı rólin bekitý, elimizdegi Prezıdenttik saıası reformalar paketin qoldaý, qaýipsizdikti nyǵaıtý, COVID-19 pandemııasynyń saldarymen kúreske arnaldy.
