Dúnıejúzilik reıtıngte 109-orynda turǵan Z.Dııas ekinshi aınalymda álemniń 86-shy, osy jarystyń 6-raketkasy, shvesııalyq Rebekka Petersonmen kortqa shyqty.
Saǵat jarymnan astam ýaqytqa sozylǵan kezdesý barysynda shvesııalyq tennısshiniń basymdylyǵy aıqyn baıqaldy. Eki sette de alǵa ketken ol 6:2, 6:2 esebimen jeńiske jetti. R.Peterson 1 eıs jasap, 12 breık-poınttyń teń jartysyn paıdalandy. Z.Dııas 6 breık-poınttyń ekeýin ǵana óz esebine jaza aldy.
R.Peterson jartylaı fınalǵa shyǵý úshin álemniń 80-raketkasy, reseılik Anastasııa Potapovamen talasady. Ol tartysty básekede fransııalyq Krıstına Mladenovıchti 1:6, 6:4, 6:3 esebimen tize búktirdi.
Osylaısha júlde qory 235 myń AQSh dollarynan asatyn Astana dodasynda jekeleı synda Qazaqstannan Iýlııa Pýtınseva ǵana qaldy.
