О́tken táýlikte COVID-19 indetine shaldyǵýdyń 79 oqıǵasy oryn aldy. Búginde oblysta 433 adam arnaıy emdeý mekemelerinde em qabyldaýda. 57 naýqas jan saqtaý bóliminde jatyr. Bir alańdatarlyǵy, sońǵy aılarda mektep oqýshylarynyń indetke shaldyǵý oqıǵasy jıilep ketti. Aıtalyq, oqý jylynan bastap 440 oqýshy qaterli derttiń qarmaǵyna ilinip otyr. Onyń 158-i dertti bilim oshaǵynan tys jerlerde juqtyrǵany anyqtalǵan. Qaýiptiń aldyn alý maqsatynda 76 oqý ornynyń 130 synyby qashyqtan oqýǵa kóshirilgen. Jańa oqý jylynan bastap joǵary oqý orny stýdentteriniń arasynda 64 adam indetke shaldyǵyp otyr. Osy oraıda Shýchınsk qalasyndaǵy joǵary tehnıkalyq kolledjde – 11, Kókshetaý qalasyndaǵy «Arna» kolledjinde – 5, azamattyq qorǵanys kolledjinde 4 indetke shaldyǵý oqıǵasy tirkeldi. Shoqan Ýálıhanov atyndaǵy ýnıversıtette de 12 stýdenttiń koronavırýs juqtyrǵany belgili bolyp otyr.
Indettiń aldyn alýdyń jalǵyz joly – ekpe ektirý. Oblys Spýtnık V, Sınofarm, QazVac vaksınasymen tolyq qamtamasyz etilgen. Memleket basshysynyń tapsyrmasyna oraı, tórtinshi toqsanda Phizer vaksınasy jetkizilmek. Otandyq vaksınanyń sheteldik ekpeden esh kemdigi joǵy áldeqashan dáleldengen. Bul arada kóńilde alańdaýshylyq týdyratyn sebep joq. Naýqan bastalǵaly oblysqa 350 650 doza jetkizilip, búginge deıin 282 123 adam ekpe aldy. Bul barlyq turǵyndardyń 68,6 paıyzy. Ekpe alýdyń kórsetkishi ár aýdanda ártúrli. Demek, uıymdastyrý, máseleniń mán-jaıyna eldiń kózin jetkizip, uǵyndyrý jumystarynyń talapqa saı emes ekeni aıtpasa da túsinikti. Qorǵaljyn jáne Jarqaıyń aýdandarynyń turǵyndary máseleniń mánisin jaqsy túsinip, túgel ekpe ektirgen. Osy oraıda Selınograd, Býrabaı, Zerendi aýdandary men Kókshetaý qalasynda ekpe egý áli de sylbyr júrip jatyr.
Shyntýaıtynda, oblysta ekpe ektirý kórsetkishi ótken aımen salystyrǵanda birshama tómendedi. Mamandardyń aıtýyna qaraǵanda, onyń negizgi sebebi – áleýmettik jelide etek alyp ketken jalǵan habarlardyń áseri. Osyǵan oraı, álemde ekpe eń aldymen aýrýdyń jeńil ótýine áser etip, COVID-19 saldarynan naýqastardyń shetineýi azaıatyny ǵylymı negizde dáleldenip otyrǵanyn taǵy bir qaıtalap aıtýǵa májbúrmiz. Tipti mysaldy alystan izdeýdiń de qajeti joq. Oblysta 282 123 ekpe egilgen adamnyń nebári 125-i ǵana aýrýǵa shaldyqty. Bul jalpy ekpe alǵan halyqtyń 0,04 paıyzy ǵana. Osy arada ekpe aldy delingenimen, jalǵan qujat jasatýshylardyń da bolǵanyn eskerý kerek. Bálkim, ekpe alǵan soń aýrýǵa shaldyqqandar sol jalǵan qujat jasatýshylar bolýy múmkin. Oblysta ekpe aldym dep jalǵan qujat jasatýshylarǵa birneshe qylmystyq is qozǵaldy.
Qyrkúıek aıynyń orta sheninen bastap tumaýǵa qarsy ekpe egý naýqany bastaldy. Bıýdjet qarjysy esebinen «Grıppol Plıýs» reseılik vaksınasynyń 87 961 dozasy alyndy. Ujymdyq ımmýnıtetti qalyptastyrý úshin turǵyndardyń kem degende 10 paıyzy tumaýǵa qarsy ekpe ektirýge tıisti. Onyń ishinde birinshi kezekte medısına qyzmetkerleri, balalar, esepte turǵan sozylmaly syrqaty bar naýqastar egiledi.
Oblysta 4 397 nysan Ashyq platformasy arqyly jumys isteýde. Jumys barysynda barlyǵy 1 416 adamnyń «qyzyl», 465 adamnyń «sary» mártebemen júrgeni anyqtalǵan. 419 adamǵa 19,7 mln teńge kóleminde aıyppul salyndy. Jyl basynan beri 28 237 nysan karantındik sharalardy saqtaýǵa baılanysty tekseristen ótkizilip, 604 márte talap buzylǵany anyqtaldy.
Aqmola oblysy
