Qazaqstan Respýblıkasy Táýelsizdiginiń 30 jyldyǵy qarsańynda ashylǵan 50 metrlik týtuǵyrdy ornatý úshin jergilikti kásipkerler 60 mln teńge qarajat jumsapty. Ǵubaıdolla Jáńgirov atyndaǵy saıabaqtyń tóbesinen jelbireıtin alyp týdyń kólemi 8h16 metr eken.
– Ultymyz úshin Táýelsizdik qandaı qymbat bolsa, Memlekettik rámizder de biz úshin sondaı qasterli. Eldigimizdi tanytý, abyroıdy asqaqtatý – qasterli qundylyqtardy qorǵaı bilýmen ólshenbek, – dedi, týtuǵyrdyń saltanatty ashylý rásiminde sóz sóılegen Bórli aýdanynyń ákimi Mırjan Satqanov.
Belgili ánde aıtylǵandaı, kók týdyń jelbiregeni talaı jannyń janyna qýat bereri sózsiz. Keńes zamanynda orysqoldaý kórinetin Bórli aýdany sońǵy jyldary erekshe qazaqylanyp, kúnnen-kúnge jasaryp kele jatqanyn jergilikti jurt ta, meımandar da jıi aıtady. Máselen, bıylǵy «Qala kúni» meıramynda shahardyń basty mádenı sharasy – «Aqsaıym arqaý jyryma» taqyrybynda oblystyq aqyndar aıtysy boldy. Belgili aqyn, aıtys janashyry Baýyrjan Halıolla aıtqandaı, Aqsaı qalasy – Batys Qazaqstandaǵy mádenıettiń astanasy deýge bolatyndaı dárejege jetipti.
Sonymen, 14 ónerpaz qatysqan oblystyq aqyndar aıtysynyń bas júldesin bórlilik Jarqynbek Shyntaev, birinshi orynda Aqjaıyq aýdanynan kelgen Bekbolat Qalenov jeńip aldy. Ekinshi-úshinshi oryndardy qaratóbelik Raıymbek О́tepov pen jańaqalalyq Orynbek Meńdiqulov bólisti. Bókeı Orda aýdanynyń namysyn qorǵaǵan Jansaıa Mýsına – Bórli aýdanynyń ákimi atyndaǵy arnaıy júldege, Aqjaıyq aýdanynan kelgen Sanat Muhanbetjanov – Marabaı jyraý atyndaǵy arnaıy júldege ıe boldy.
Batys Qazaqstan oblysy
