Departament sybaılas jemqorlyqqa qarsy kúreste osyndaı faktiler týraly habarlaıtyn azamattardy kótermeleý sharalaryn «pármendi tetik» dep atady.
«Qazaqstanda azamattardy kótermeleýdiń jańa saralanǵan júıesi engizildi. Buryn bul qylmys sanatyna baılanysty júzege asyrylǵan. Qazir sybaılas jemqorlyq týraly habarlaǵan adam para nemese zalal somasyna qaraı osy somanyń 10%-na ıe bolady. Bul rette eń joǵary syıaqy 4 000 AEK nemese 11,6 mln teńgege deıingi somany quraıdy. Departament bes adamdy sybaılas jemqorlyq faktileri týraly habarlaǵany úshin jalpy somasy 760 myń teńgege marapattady», dedi Sybaılas jemqorlyqqa qarsy qyzmet departamenti basshysynyń birinshi orynbasary Qýanysh Myrzaǵalı.
Sybaılas jemqorlyq faktisi týraly habarlaǵan adamdardy qorǵaý tıisti túrde júzege asyrylady. «Sybaılas jemqorlyqqa qarsy is-qımyl» týraly QR Zańyna sáıkes mundaı jaǵdaılar týraly habarlaǵan adam aqshalaı qarajatpen yntalandyrylyp qana qoımaı, memlekettiń qorǵaýynda bolady. Mundaı adam týraly aqparat memlekettik qupııa retinde saqtalady.
«Sybaılas jemqorlyq faktilerimen kezdesken jaǵdaıda Agenttiktiń 1424 nómirine, sondaı-aq, Mańǵystaý oblysy boıynsha sybaılas jemqorlyqqa qarsy qyzmettiń kezekshi bólimine 8 (7292) 319110 qońyraý shalýǵa bolady», dep jazylǵan habarlamada.
