EKSPO kórmesinde

«Biz úshin qazirgi shekteýlerge qara­mastan, IX teatr maýsymyn óz ýaqy­tynda ashý óte mańyzdy boldy. Kórer­mendermen qaýyshýdy asyǵa kúttik. Ártister sahnany, al kórermen spek­taklderdi saǵyndy. Qazir bizdiń úlken josparlarymyz bar. Barsha kórermendi Astana Ballet teatryna shaqyramyn», dedi teatr dırektory A.Sovostıanov baspasóz máslıhatynda.

Aıta keteıik, toǵyzynshy teatr maýsymy 9-10 qyrkúıek kúnderi «Beıbarys sultan» baletimen ashylǵan edi. Al 17-18 qyrkúıek kúnderi «Mahabbat týraly ańyz» baleti kórsetildi.

«Mahabbat týraly ańyz» ben «Beı­barys sultan» – teatr repertýaryndaǵy sátti shyqqan qoıylymdar, olardy karantın ýaqytynan keıin al­ǵash ret gastrolge – Dýbaıdaǵy EKSPO-2020 kórmesine aparamyz. Astana Ballet teatry­nyń ujy­my Dýbaı­dyń úlken, jańa, aldyńǵy qa­tar­ly teatrla­ry­nyń birinde osy eki ta­masha týyndyny usynady», dedi Alek­sandr Alek­san­drovıch.

Sondaı-aq Astana Ballet teatry osy maýsymda «Leonıd Ilıch Brejnevke qarsy Jarqanat adam. Keńestik trıller» spektaklin qoıady.

«IX teatr maýsymyna kelsek, jyl sońyna deıin úsh úlken premera jos­parlanǵan. Qazan aıynda bizdiń sahnada Kishi Bronnaıadaǵy teatrdyń gastrolderi ótedi. «Leonıd Ilıch Brej­nevke qar­sy Jarqanat adam. Keńestik trıller» spektakli qoıylady. Bizdiń oıy­myz­sha, óte qyzyq qoıylym bolady. Bul Máde­nıet jáne sport mınıstrligi Nur-Sultan qalasynyń ákimdigimen birlesip uıymdastyratyn teatr aptalyǵynda ótedi. Teatr apta­lyǵynyń ótetin kú­ni ja­qyn arada habarlanady», dedi A.Sovostıanov.

Gastrolder aıaqtalǵan soń Djordj Balanchınniń fortepıano men orkestrge arnalǵan «Kaprıchıo» baletiniń qo­ıylymy úshin Balanchın qorynan pedagog-repetıtor keledi. Odan bólek, óner ujymy bas baletmeıster Mýkaram Avahrıdiń «Taǵdyr bultarystary» jańa baletin qoıýdy josparlap otyr.

«Qarasha aıynda Chehııadan pedagog kelip, ártisterimizge master-klass ót­kizedi. Jeltoqsan aıynda Ksenııa Zve­revanyń «О́ner sıntezi» zamanaýı bale­tiniń jańa qoıylymy kútilýde, onda tek balet qana emes, mýzyka, drama, sán de biriktiriledi. Sáýir aıynyń basynda taǵy bir spektakldiń premeralyq kórsetilimi josparlanǵan. Árıne, kórermen arasynda úlken jetistikke jetken «Qozy Kórpesh pen Baıan Sulý» sııaqty qazirgi repertýardy da usynamyz. Sondaı-aq jańa jyldyq dástúrli «Shelkýnchık» shoýlary jáne taǵy basqalary bolady», dedi teatrdyń kórkemdik jetekshisi Nurlan Qanetov.