Megapolıs Almaty – Qapshaǵaı trassasynyń boıynda ornalasatyn bolady jáne tórt aýdannan turady: Gate District – iskerlik jáne qarjy ortalyǵy, Golden District – bilim berý jáne medısınalyq hab, Growing District – ónerkásiptik jáne logıstıkalyq hab, Green District – týrızm jáne oıyn-saýyq.
G4 City-ge arnaıy ekonomıkalyq aımaq mártebesi beriledi. Halyqaralyq áýejaı salyp, Sıngapýrmen tikeleı áýe qatynasyn ashý josparda bar.
G4 City Ortalyq Azııanyń jańa ekonomıkalyq habyna aınalyp, Qazaqstan ekonomıkasyna túsetin sheteldik ınvestısııalardyń odan ári ósýine eleýli serpin beredi dep kútilýde. 2050 jylǵa qaraı megapolıs aýmaǵynda 2,2 mln adam turyp, 1 mln-nan astam jumys orny qamtamasyz etiledi.
Qazirgi ýaqytta Gate District-te magıstraldyq ınjenerlik jeliler júrgizilgen, «Qoıanqus» turǵyn aýdany salynyp jatyr. 3,5 jyl ishinde keminde 300 myń sharshy metr turǵyn úı salý josparlanyp otyr.
G4 City-di damytýmen sıngapýrlyq «Surbana Jurong Group» memlekettik kompanııasy aınalysady. Bul – qalalar men ınfraqurylymdy damytý máseleleri boıynsha Azııadaǵy eń iri korporasııalardyń biri. Ol Sıngapýrdyń Temasek Holdings táýelsiz qoryna tıesili, onyń 16 myń qyzmetkeri bar, álemniń 40 elinde qyzmet kórsetedi. Kompanııa Sıngapýrda 1 mln-nan astam úıdi damytýmen aınalysty, 30 el úshin bas jospar ázirledi, 100-den astam ındýstrııalyq parkterdi jobalady.
Tanystyrylym qorytyndysy boıynsha qazaqstandyq «Caspian Group» AQ kompanııasy men «Surbana Jurong Group» arasynda G4 City jobasyn iske asyrýda yntymaqtastyqty odan ári jalǵastyrý týraly kelisimge qol qoıyldy.
