Balalyq baldáýreni ótip, orta bilim alǵan Kóktoǵaı aýylynan alysqa uzaǵan joq. Buǵan birinshiden, týǵan topyraǵyna degen perzenttik mahabbaty yqpal etti-aý deımiz. Ekinshiden, ózi sekildi aýyldyń talaı balasyna on jyl boıy sapaly bilim bergen, ómiri ónegege toly ustazdarynyń jolyn jalǵastyrýdy kózdegeni áser etkeni daýsyz. Onyń ústine atasy Baıbek Ǵabdolla HH ǵasyrdyń 30-jyldarynda Tolybaı aýyldyq keńesinde ustaz bolyp, ilim-bilimge qushtar balalardyń júrek túkpirine bilimniń jaryq sáýlesin jaqqan. Al aýyldastary «qatal» muǵalim ataǵan anasy Salıha Ibatova da oqýshylardyń orys tilin meńgerýine úles qosty.
– Meniń atam da, anam da – shákirt tárbıeleýge sanaly ǵumyryn arnaǵan jandar. Ustazdyq joldy tańdaýyma anamnyń jumys tájirıbesin, adamgershilik qasıetterin úlgi tutqanym áser etti. Sóıtip, 1983-1988 jyldary Gýrev pedagogıkalyq ınstıtýtynyń tarıh fakýltetinde joǵary bilim aldym. Tarıh fakýltetine barýyma mektepte osy pánnen sabaq bergen Ǵadiljan Kereevtiń yqpaly zor boldy. Instıtýttan soń birden Inder aýdanynyń Kóktoǵaı aýylynda ornalasqan Keńes Odaǵynyń Batyry Boran Nysanbaev atyndaǵy orta mektepke jumysqa ornalastym. Bul – ózim qanattanǵan bilim uıasy, – dep alǵash eńbek joly bastalǵan sátti eske aldy Aqmaral Láıkeqyzy.
Sodan beri ózi oqyǵan mektepten taban aýdarmaı, jumys istegenine 33 jyldan asty. Osy kezeńde mektep dırektory Ábdirahman Kárentaev, oqý isiniń meńgerýshisi Gúlbaný Ájiǵalıeva, Ǵadiljan Kereev, Ilııas Orazǵalıev syndy óz isiniń sheberi atanǵan bilikti ustazdardyń eńbekqorlyǵynan, mamandyqqa adaldyǵy men tájirıbesinen úırendi. Aǵa býynnyń qalaýymen mektepte basshylyq jumysty 20 jyl atqardy. Eń bastysy, izdený, bilimin jetildirý, mektepke sabaq bastalardan 15 mınýt buryn kelýdi daǵdyǵa aınaldyrdy. Áli de osy daǵdydan jańylǵan joq.
– Búgingi bilim berý júıesiniń basty kredosy – ózgeris, jańarý, damý, órkendeý. Soǵan baılanysty zamanaýı suranystarǵa sáıkes tyń ıdeıalarǵa qoldaý kórsetilip, oń bastamalardyń qoldanysqa engizilýine jol ashyldy. Jańartylǵan bilim berý baǵdarlamasy – sapaly bilim alýǵa negizdelgen zamanaýı úlgidegi baǵdarlama. Onda ár pánniń ádistemelik áleýetin qoldanýǵa, oqý, joba, zertteý tásilderin meńgertý arqyly oqýshylardyń derbestigin damytý kózdelgen. Osyǵan oraı muǵalimderdiń kózqarasy, sabaq ótkizý ádisi, oqýshylardyń ózara qarym-qatynasy ózgerdi. Muǵalimder ámirshildik stılden aryldy. Oqýshylar sabaq kezinde tek tyndaýshy, oryndaýshy ǵana emes, izdenýshi retinde dáris alady, – deıdi Qazaqstannyń eńbek sińirgen ustazy.
Muǵalimniń aıtýynsha, «Aýyl mektebinde oqyǵan oqýshylardyń bilimi tómen» degen jańsaq uǵymnan arylý kerek. О́ıtkeni bul – keńestik júıedegi bilim berý salasynda qalyptasqan pikir. Buǵan sol kezdegi aýyl mektepteriniń materıaldyq-tehnıkalyq bazasynyń tómen bolǵany áser etken. Biraq qazir jaǵdaı kúrt ózgerdi. Aýyldaǵy bilim uıasynyń úlken shaharlardaǵy mektepten esh aıyrmasy joq. Muǵalimder biliktiligin arttyryp, jańa tehnologııamen jumys isteıdi.
– Qazir aýyl mektebi jan-jaqty jabdyqtaldy. Endi bilim sapasyn obektıvti, sýbektıvti ólshemsharttar arqyly taldaý qajet. Ár shákirti bilimdi, zeıindi bolsa, bul – muǵalimniń mereıi. Sondyqtan orta bilim berý mazmunyn jańartý baǵytynda engizilip jatqan jańashyl maqsat men mindetterdi, jańa tehnologııalardy, quzyrettilikke negizdelgen baǵalaýdyń jańa formasyn aldymen muǵalimniń ózi ıgergeni jón. Sonda ǵana sapaly bilimge qol jetkizemiz, – deıdi joǵary sanatty muǵalim.
Ár kúni qarbalasqa toly muǵalimniń esinde bıylǵy 18 naýryz umytylmastaı bolyp qalǵan. О́ıtkeni dál sol kúni ony tosynsyı kútip turdy. Bul – Bilim jáne ǵylym mınıstri Ashat Aımaǵambetovtiń ózi tapsyrǵan «Qazaqstannyń eńbek sińirgen ustazy» qurmetti ataǵy. Muny aýyl muǵalimi Aqmaral Ǵabdýllınanyń baǵyndyrǵan asýy degenimiz jón bolar. Elordadan shaqyrtý jetkende, «Oqý toqsany aıaqtalatyn kezde oqýshylardyń bilim deńgeıin qorytyndylaýym kerek. Sol sebepten, elordaǵa barýǵa ýaqytym joq» dep, birinshi kezekke jumysyn qoıǵany bar. Osynyń ózinen kásibine adaldyǵy baıqalyp tur.
Atyraý oblysy,
Inder aýdany
