«Er adam tergeýshiniń shotyna telefon nómiri boıynsha aqsha aýdarǵan, biraq bul týraly qaýipsizdik basqarmasy dereý habarlady», dep jazady jergilikti BAQ.
Oral qalalyq sotynda 52 jastaǵy er adamǵa qatysty úkim shyǵarylǵan. Is materıaldary boıynsha orta mekteptiń elektrıgine qatysty sotqa deıingi tergeý júrgizildi. Oǵan jas balalardy azǵyndady degen aıyp taǵylǵan.
«Aıyptalýshy onyń isin júrgizgen tergeýshiniń telefon nómirin bilip, oǵan tergeýdiń nátıjesine ózgeris engizý úshin banktegi shotyna telefon nómiri arqyly 50 myń teńge aýdarýǵa sheshim qabyldaǵan. Tergeýshiniń ózi bul jaıly beıhabar bolǵany aıtylady. Tergeýshi para alýdan bas tartyp, qaýipsizdik basqarmasyna júgindi», delingen is materıaldarynda.
Er adam kinásin tolyqtaı moıyndap, ókinetinin aıtty.
«Sot úkimimen ol laýazymdy adamǵa para bergeni úshin kináli dep tanyldy. Oǵan 562 myń teńge kóleminde aıyppul salyndy. Úkim zańdy kúshine engen joq jáne oǵan shaǵym jasalýy múmkin», delingen qujatta.
Jas balalardyń azǵyndyq faktisi boıynsha polısııa departamentiniń baspasóz qyzmeti qylmystyq is sotqa jiberilgenin habarlady. Kúdikti qamaýda.
