Portýgalııanyń qıyn jeńisi

Negizi kezdesýdiń bastalǵanyna tórt mınýttaı ótkende Dáýren Tur­sa­ǵu­lov pen Shyńǵys Esenamanov uıym­­dastyrǵan tamasha shabýyldyń arqa­synda Birjan Orazov gol soqqan bolatyn. Biraq sonyń aldynda dop syrtqa shyǵyp ketkendikten, tóreshi ony eseptemedi. Sodan keıin pozısııa úshin tartys bastaldy. Qos komanda da ba­ryn salyp, aıqas alańynda ózderiniń basymdyǵyn dáleldeýge tyrysty. Eki jaqtyń oıynshylary jıi-jıi alǵa umtylyp, qaýipti shabýyldar uıym­dastyrǵanymen, qorǵanysta da óte saq oınaýǵa tyrysty. О́ıtkeni osyndaı asa shıelenisti básekede bir goldyń ózi bar­lyq máseleni sheshýi múmkin edi.

Birinshi kezeńde erekshe este qal­ǵan jaıttar kóp boldy. Máselen, Taı­nannyń qulap bara jatyp, qaı­shylap tepken doby mańdaıshaǵa tıdi. Burysh­tamadan berilgen dopty Orazov qaqpaǵa qaraı baǵyttaǵan edi, alaıda ol baǵanaǵa baryp soǵyl­dy. Sol sekildi Portýgalııa fýtzal­shy­larynyń da tablodaǵy esepti ózger­týge birneshe múmkindigi boldy. Biraq Igı­tanyń eptiliginiń arqasynda qaq­pamyz aman qaldy.

Úzilisten keıin oıyn qaıta jan­dandy. 23-mınýtta Anılton Sezar Panı portýgalııalyqtardy alǵa shy­ǵardy – 1:0. Tarazy basyn teńesterý úshin jerlesterimizge kóp ter tógýge týra keldi. Tek negizgi ýaqyttyń aıaq­talýyna sanaýly sekýndtar ǵana qal­ǵanda Kaka qaqpashy Igıtanyń ornyna Dáýren Nurǵojındi besinshi oıynshy retinde alańǵa shyǵardy. Bas bapkerdiń bul taktıkasy óz jemisin berdi, oıyn aıaqtalýǵa sanaýly sekýnd qalǵanda Dáýren tepken dop torda týlady – 1:1.

Oıyn ekstra-taımǵa ulysyp, ekin­shi mınýtta Jýnıor Dýglas aıyp dobyn óte keremet oryndady – 1:2. Dop­ty kózben shyǵaryp salǵan qaqpa­shynyń basyn shaıqaǵannan basqa amaly qalmady. Biraq bul basym­dyqty biz ustap tura almadyq. Qo­symsha ýaqyt aıaqtalar tusta Brýný Koelıý esepti teńestirip ketti – 2:2. Al penal­tı soǵý ba­rysynda Pıre­neı túbegi túlek­teriniń baǵy jandy. Qory­­tyndy esep 2:2 (4:3). Bul jeńistiń Por­­týgalııa fýt­zal­shylaryna ońaı kel­megeni son­sha­lyq, olardyń keıbir oıynshylary qýanyshtan kózderine erik berdi. Al bizdiń Qa­zaqstan quramasyn da je­­ńildi dep aıtýǵa aýyz barmaıtyndaı kúı kesh­kenimiz taǵy ras.

Jeksenbiden dúısenbige qaraǵan túni jerlesterimiz Brazılııa qurama­symen qola medal úshin saıysqa tústi. Al bas júlde úshin tartys Argen­tına men Por­tý­galııa fýtzalshy­lary ara­syn­­da órbidi. Bul básekelerdiń qalaı ótkeni jaıynda gazetimizdiń erteńgi sanynda egjeı-tegjeıli baıandaıtyn bolamyz.