Búginde 28 jyldan asatyn eńbek ótilim bar. Nur-Sultan qalalyq №1 balalar mýzyka mektebinde horeograf bolyp jumys isteımin. Horeografııa bóliminiń meńgerýshisimin. Bólimde 130-ǵa jýyq shákirt tárbıelenedi. О́zimmen qatar tórt muǵalim tálim beredi. Men 4-7-synyp oqýshylaryna «Halyqtyq sahnalyq bı» sabaǵyn ótkizemin. Izimdi basyp, ustaz-horeograf bolyp júrgen shákirtterim de bar. Sondaı-aq bizdiń bólimnen túlep ushqan Elızaveta Palınka horeografııa akademııasyna, al Darıa Tarybo Qaraǵandydaǵy Táttimbet atyndaǵy óner kolledjiniń horeografııa bólimine oqýǵa qabyldandy. Biz úshin etken eńbektiń jemisi – osy.
Baıqaý barysynda aldymen ózimniń jáne shákirtterimniń jetken jetistikterin jipke tizip, portfolıo ázirledim. «Meniń mektebim – júregim» taqyrybynda beınerolık túsirdim. Sabaq ótkizdim. Sol qujattarmen qalalyq kezeńge qatysyp, ekinshi oryn ıelendim. Osylaısha konkýrstyń respýblıkalyq kezeńine joldama alǵan bolatynmyn. Bilýimizshe, baıqaý óte tartysty ótken eken. Sheshim shyǵarý da ońaı bolmaǵany anyq. Baıqaýda bas-aıaǵy 64 ustaz júldeli boldy. Olardyń arasynda men de barmyn.
Bıyl ult ustazy, aǵartýshy Ybyraı Altynsarınnyń týǵanyna 180 jyl, elimiz Táýelsizdik alǵanyna 30 jyl tolyp otyr. Sonymen qatar osy konýrstyń uıymdastyrylyp kele jatqanyna 10 jyldyń júzi boldy. Mereıli datalarǵa toly jyl dese de bolady. Sondyqtan uıymdastyrýshylardyń uıǵarymymen baıqaý bıyl Y.Altynsarınniń kindik qany tamǵan óńir sanalatyn Qostanaı qalasynda ótti.
Osydan eki jyl buryn «Pedagog mártebesi týraly» Zań qabyldanyp, elimizdegi ustazdardyń mártebesi aıqyndalǵan bolatyn. Sodan beri muǵalimderdiń jaǵdaıy jaqsara bastady. Árıne, ár pedagog belgili bir jetistikke jetý úshin baryn salyp, talpynyp, tyrysyp jatady ǵoı. Avtorlyq, ınnovasııalyq jumystardy qolǵa alyp, bilim salasyna tamshydaı bolsyn úlesin qosýǵa umtylady. Sol umtylys laıyqty baǵalana bastady. О́zim – pedagog-zertteýshimin. Bul mártebem úshin jalaqyma 40 paıyz eńbekaqy qosylady. Pedagog-sheberge qosylatyn ústemeaqy mólsheri 50 paıyzdy quraıdy. Memleket tarapynan jasalyp jatqan mundaı qoldaý – ustazdardy jumys deńgeıin arttyrýǵa yntalandyrady.
Sondyqtan «Pedagog mártebesi týraly» Zańǵa qol qoıyp, ult ustazdaryna qomaqty qoldaý kórsetken Memleket basshysy Qasym-Jomart Toqaevqa jáne muǵalimderdiń jaǵdaıyn jaqsartý máselesinde Prezıdenttiń tapsyrmasyn múltiksiz oryndap kele jatqan Bilim jáne ǵylym mınıstri Ashat Aımaǵambetovke alǵysymyz sheksiz. Vedomstvo basshysy bilim salasyndaǵy barlyq qyzmetti jete qadaǵalap keledi. Sonyń nátıjesinde ustazdar qaýymy da jemisti jumys istep, alańsyz qyzmet etý ústinde.
Bagdına SEKERBEK,
«Úzdik pedagog-2021» konkýrsynyń júldegeri
