Elimizde «Jábirlenýshilerge ótemaqy qory týraly» Zań ótken jyldyń 1 shildesinen bastap qoldanysqa engizildi. Zań jobasy Qylmystyq-prosestik kodeksiniń 173-babyn iske asyrý úshin Qarjy, Ishki ister mınıstrlikteri jáne múddeli memlekettik organdarmen birge ázirlengen bolatyn. Brıfıngte zańnyń iske asyrylý joldaryn jan-jaqty túsindirip ótken IIM ókili atalǵan ınstıtýttyń jábirlenýshilerdiń quqyqtaryn qalpyna keltirýde eleýli áser etetinine de erekshe mán berdi.
«Qylmystyq quqyq buzýshylyqtardan zııan shekken jábirlenýshilerge ótemaqy tóleýdi kózdeıtin zań elimizde alǵash ret qabyldanyp otyr. Qujat kináli adamǵa ustalǵanǵa jáne sot isti qaraǵanǵa deıin jábirlenýshiniń emdeýge, ońaltýǵa, jerleýge ketken shyǵyndaryn tolyǵymen óteýdi mindetteıdi. Al buryn jábirlenýshige keltirilgen zalaldyń orny úkim zańdy kúshine engennen keıin sottyń sheshimi boıynsha ǵana toltyrylatyn», dep túsindirip ótti polısııa polkovnıgi.
Departament basshynyń málimdeýinshe, zań boıynsha jábirlenýshilerge alǵashqy birjolǵy materıaldyq kómek kórsetiledi. Ol úshin Qarjy mınıstrliginiń Qazynashylyq komıtetinde zańdy tulǵa bolyp tabylmaıtyn, qolma-qol aqshany baqylaý shoty bar arnaıy qor qurylǵan. Bir aıta keterligi, bul qor memlekettik bıýdjetten qarjylandyrylmaıdy. Qor qylmystyq quqyq buzýshylyqtardy jasaǵany úshin óndirip alatyn májbúrli tólemder jáne prosestik mindetterdi oryndamaǵany úshin sot salatyn aqshalaı óndirip alýlardan toltyrylyp otyrady. Sondaı-aq qordy toltyrýdyń túzeý jumystary men regrestik talaptar tártibimen óndirip alynǵan aqsha jáne Qazaqstan zańnamasynda tyıym salynbaǵan ózge de qarjy kózderi qarastyrylǵan.
«Zańda qylmystardyń 124 quramy boıynsha jábirlenýshilerdiń úsh sanatyna ótemaqy tólenedi. Birinshi sanatqa seksýaldyq zorlyq-zombylyqqa tap bolǵan kámeletke tolmaǵandar, adam saýdasy jáne azaptaýǵa ushyraǵan jábirlenýshiler jatady. Olarǵa tólenetin ótemaqynyń mólsheri shamamen 90 myń teńge. Al densaýlyǵyna aýyr zııan keltirilgen ne ımmýn tapshylyǵy vırýsyn (AITV/JITS) juqtyrǵan ekinshi sanattaǵy adamdarǵa 120 myń teńge kóleminde ótemaqy tólenedi», dep zań talaptaryna egjeı-tegjeı toqtalǵan S.Ádilov úshinshi sanat – jábirlenýshi qaıtys bolǵan jaǵdaıda beriletin ótemaqynyń 150 myń teńge kóleminde ekenin de málimdedi.
«Tólemderdiń tizbesin sotqa deıingi tergep-tekserý organdary júrgizip, aı saıyn Qazynashylyqqa usynyp otyrady. Alaıda azyq-túlik baǵasynyń kún sanap qymbattap jatqany barshaǵa belgili. Jalpy, halyq ómiriniń qymbattaýyn eskere otyryp, IIM Qarjy mınıstrligine jábirlenýshilerge tólenetin ótemaqynyń mólsherin kóbeıtý týraly usynys ta joldady», dep atap ótti spıker.
Naqty málimetterge súıener bolsaq, 2020 jyldyń ekinshi jarty jyldyǵynda 260-tan astam jábirlenýshige 22 640 000 teńge kóleminde ótemaqy tólengen. Alaıda brıfıng barysynda S.Ádilov bul kórsetkishtiń jyl saıyn ósip kele jatqanyn da habarlady.
