Taraptar qylmystyq qýdalaý jáne adam quqyqtaryn qorǵaý, zańdylyq pen sot tóreligin ilgeriletý máselelerin talqylady. IIM basshysy adam quqyqtary salasyndaǵy halyqaralyq standarttardy saqtaý, jazalardyń oryndalýyn izgilendirý jáne azamattyq baqylaýdy kúsheıtý boıynsha júrgizilip jatqan jumystar týraly áńgimeledi.
«El Prezıdenti ishki ister organdarynyń adam quqyqtaryn qamtamasyz etý jáne quqyq qorǵaý qyzmetin jetildirý baǵytyndaǵy qyzmetine erekshe kóńil bóledi. Osyǵan baılanysty qylmystyq-atqarý júıesin reformalaýdyń negizgi basymdyqtary, birinshi kezekte, adam quqyqtaryn saqtaý, sottalǵandardy ustaý jaǵdaılaryn jaqsartý jáne penıtensıarlyq ınfraqurylymdy halyqaralyq standarttarǵa sáıkes jańǵyrtý bolyp aıqyndaldy», dep málimdedi Erlan Turǵymbaev.
Ol mınıstrliktiń adam quqyqtaryn saqtaý máseleleri boıynsha halyqaralyq is-sharalarǵa belsendi qatysatynyn atap ótti.
«Bizdiń bastamamyz boıynsha jáne Ortalyq Azııadaǵy Halyqaralyq túrme reformasy (PRI) ókildiginiń qoldaýymen 2019 jylǵy mamyrda birinshi penıtensıarlyq forým, al osy jylǵy shildede dıplomatııalyq mıssııalar (Eýroodaq, BUU) basshylarynyń, adam quqyqtary salasyndaǵy ulttyq jáne halyqaralyq sarapshylardyń jáne basqa da resmı tulǵalardyń qatysýymen ekinshi halyqaralyq forým («qazirgi kezeńdegi penıtensıarlyq júıe») ótkizildi. Forýmǵa qatysýshylardyń pikirleri men usynystaryn talqylaǵannan keıin sottalǵan adamdardyń quqyqtyq jaǵdaıyn jaqsartý úshin qoldanystaǵy zańnamaǵa ózgerister men tolyqtyrýlar engiziledi», dep atap ótti Qazaqstannyń ishki ister mınıstri.
Memleket basshysynyń tapsyrmasy boıynsha, quqyqqa qaıshy áreketterdi boldyrmaý maqsatynda polısııanyń barlyq qyzmettik úı-jaılarynda jáne penıtensıarlyq mekemelerde beınekameralar ornatý jumystary bastalǵany atap ótildi.
Mınıstr sondaı-aq qazaqstandyq polısııa qyzmetin aýqymdy reformalaý jáne ishki ister organdaryn jańǵyrtý jónindegi Jol kartasyn iske asyrý týraly aıtyp berdi.
Atap aıtqanda, halyqpen keri baılanys ornata otyryp, polısııa jumysynyń servıstik modeline kóshý, «jurtqa jaqyn polısııa» qaǵıdatyn qamtamasyz etý, qaýipsizdiktiń qazirgi zamanǵy júıelerin, qoljetimdilik pen turǵyndardyń senimine qatysty negizgi krıterııler boıynsha ishki ister organdarynyń qyzmetin baǵalaýdyń jańa júıesin engizý jaıynda keńinen áńgimeledi.
Kezdesý barysynda taraptar quqyqtyq tártipti qamtamasyz etý, qylmysqa qarsy kúres jáne adam quqyqtaryn saqtaý salalarynda mınıstrlik halyqaralyq sarapshylardyń kómegimen belgili bir jumys atqarylǵanyn tilge tıek etti.
