T.Qulybaev eńbek naryǵyna shyǵatyn daıyn kásipkerlerdiń úlesin arttyrý qajettigine toqtaldy. Sondyqtan bul pánniń mańyzyn atap, ustazdardyń atqaryp jatqan eńbegine alǵys aıtty.
«Sizder oqytyp jatqan balalar kásibin bastap, elge qyzmet ete alady. Otbasyna jaǵdaı jasap, jańa jumys oryndaryn ashady. Sondyqtan bul búginge kerek jumys. Elimiz jas, mektepte 3 mln-ǵa jýyq bala oqıdy. Jaqyn ýaqytta 3,5 mln-ǵa jetedi. Kolledj ben ýnıversıtetterde bilim alatyn mln-ǵa jýyq stýdent bar. Iаǵnı jyl saıyn eńbek naryǵyna shyǵyp, nemen aınalysatynyn biletin adam sany artyp keledi. Memleket el ekonomıkasyndaǵy shaǵyn jáne orta bıznes úlesin 50 paıyzǵa jetkizý kerek degen tapsyrma qoıdy. Sebebi turaqty damyǵan memleket bolý úshin osyndaı kórsetkishke jetý kerek», dep atap ótti T.Qulybaev.
Nur-Sultan qalasynyń №1 mektep-lıseıinde bilim beretin Gúlnara Kárimovaniń oqýshylary sabaqqa qatysqandy unatyp qana qoımaı, sonymen qatar kásipkerlik boıynsha olımpıadalar men konkýrstarǵa qatysady. Olardyń keıbiri óz isin de ashqan. 5starseducation DALA School balalardy damytý ortalyǵy – joǵary synyptyń eki oqýshysy Tımýr Rýslanov pen Saǵıda Aıtqojınanyń birlesken jobasy. Balalar mektepte bıznes júrgizý negizderi boıynsha daǵdylardy meńgerip, kásip júrgizip otyr. Búginde jobanyń jalpy túsimi – shamamen 5 mln teńge.
«Oqýshylaryma sabaq unaıdy. Tórt oqýshydan turatyn komanda Ozgeris bıznes-ınkýbatorynda 50 myń teńgeniń grantyn jeńdi. Sondaı-aq 2020 jyly joǵary synyp oqýshysy Marsel Madııarov AIFC Finance and Economics Olympiad konkýrsynda birinshi oryndy ıelenip, altyn medal aldy. Bolashaqta balalarymyzdy Forbs tiziminen kórgimiz keledi», dep bólisti pedagog.
Ekibastuzdan kelgen muǵalim Darııa Doshımova pán tek oqýshylarǵa emes, sondaı-aq muǵalimderge de qyzyqty ekenin atap ótti. Ol mektep oqýshylary men stýdentterdi kásipkerlik negizderine beıimdep, oqytýǵa kómektesý úshin beıindi qaýymdastyq qurýdy usyndy. Qaýymdastyq muǵalimderdiń biliktiligin arttyrýǵa turaqty kýrstar, ádisnamalyq qoldaýdy uıymdastyrýǵa kómektesedi.
«Bul muǵalimder úshin óte qajet. Sebebi biz bolashaq kásipkerlerdi daıarlaımyz. Odan ári Ulttyq kásipkerler palatasy árbir oqýshynyń daǵdysyn damytyp, qarjy alýǵa, bıznes bastaýǵa múmkindik beredi. Startaptyń jumysyn súıemeldeıdi», dedi D.Doshımova.
Oqytýshylar T.Qulybaevqa 5-9-synyp oqýshylary úshin ekonomıka, bıznes jáne qarjylyq saýattylyq negizderi boıynsha mektep baǵdarlamasyna arnaıy kýrstar engizýdi usyndy. Sonymen qatar ustazdar úshin biliktilikti arttyrý kýrsyn kóbeıtýdi surady. Tóralqa tóraǵasy bul máseleni sheshýge ýáde berdi.
«Biz muǵalimderdi qoldaý jaǵynan bar jaǵdaı jasaımyz. Ustazdar jylyna bir ret qana biliktilikti arttyrý kýrsynan ótedi. Endi Bilim mınıstrliginiń resýrstary jetpese, biz «Halyq» qory arqyly bul olqylyqtyń ornyn toltyrýǵa tyrysamyz. Muǵalimder jylyna bir emes, ózińiz aıtqandaı tórt retke deıin biliktilikti arttyrý kýrsynan ótý kerek», dedi Tóralqa tóraǵasy.
T.Qulybaev jobanyń bolashaǵy birinshi kezekte oqytýshylarǵa baılanysty ekenin atap, olar aıtqan usynystardyń bárin qabyldaıtynyn atap ótti. Bul úshin Bilim mınıstrliginiń ókilderimen kezdesip, tıisti shara júrgiziletinin jetkizdi.
«Ulttyq kásipkerler palatasy «Kásipkerlik jáne bıznes negizderi» pánin oqytý qalaı júrip jatqanyn jiti qadaǵalaıdy. Sizdiń tikeleı qatysýyńyzben Qazaqstanda mektep partasynan bastap erekshe bıznes-orta qalyptasyp jatqanyna rızashylyǵymyzdy bildiremiz. Bul el ekonomıkasy úshin mańyzdy. Ortaq jumysymyzdyń jemisin kórip otyrmyz – bilimmen qarýlanǵan mektep oqýshylary kásipkerlikke batyl qadam basyp, bıznesin ashyp jatyr. Onyń aýqymyn keńeıtý úshin sizderdiń jobany damytý jáne jaqsartý boıynsha usynystaryńyzdy zerdelep, Bilim mınıstrligimen talqylaımyz», dedi T. Qulybaev.
Aıta ketelik, 2017 jyly mektepterde «Kásipkerlik jáne bıznes negizderi» pánin engizý boıynsha qanatqaqty joba ótti. «Atameken» UKP men Bilim jáne ǵylym mınıstrliginiń bastamasymen 2019 oqý jylynan bastap elimizdiń jalpy bilim beretin mektepterindegi 10-11-synyptar úshin «Kásipkerlik jáne bıznes negizderi» páni engizildi. Pán oqytýshylary biliktilikti arttyrý kýrstarynan ótti. 2021 oqý jylynan bastap «Kásipkerlik qyzmet negizderi» páni TjKB uıymdary úshin memlekettik jalpyǵa mindetti bilim berý standartyna negizgi modýldik pán retinde engizildi.
Atameken Asademy bilim berý platformasynda «Kásipkerlik negizderi» pánin oqyp jatqan oqýshylar men kolledj stýdentterine arnalǵan Ozgeris bıznes-ınkýbatory jáne Atameken Stars Startap jobalarynyń respýblıkalyq onlaın-konkýrsy uıymdastyryldy. Atameken.co onlaın platformasynda oqýshylar men oqytýshylar úshin «Kásipkerlik jáne bıznes negizderi» páni boıynsha vıdeosabaqtar men qosymsha materıaldar daıyndaldy.
2019-2021 jyldary «Atameken» jalpy bilim beretin mektepterdiń 5,2 myń muǵalimi, kolledjderdiń 1,7 myń oqytýshysy úshin kásipkerlik negizder boıynsha biliktilikti arttyrý kýrstaryn ótkizdi. 2021 jyly muǵalimderdi oqytýdyń úshinshi legi 27 qazan men 12 qarasha aralyǵynda ótedi.
