Jalpykomandalyq esepte 1-oryn Shalqar, 2-oryn Oral, úshinshi oryn Nıkeltaý atqyshtar komandalaryna berildi. Jekelegen sportshylar arasynan úzdik qorǵaýshy ataǵyn Shalqar atqyshtar komandasynan – Abylaı Almanov, úzdik tennısshi – Oral atqyshtar komandasynan Anton Garaev, úzdik qaqpashy – Qandyaǵash beketinen Ǵazız Edigeev, úzdik shabýylshy – Áıteke bı beketinen Azamat Amanjoluly, úzdik gir kóterýshi atalymyn nıkeltaýlyq Aman Muhanbetqalıuly jeńip aldy. Saıys qorytyndysy boıynsha úzdikkomandalyq eseptegi Nıkeltaý, Oral, Shalqar beketteri sportshylaryna berilgen eń qurmetti syılyq – sporttyq jabdyqtar.
– Fılıal ujymynda salamatty ómir saltyn nasıhattaý, qyzmetkerlerdiń deneshynyqtyrýmen aınalysýyna múmkindik týǵyzýǵa basa mán beriledi. Ár aptanyń seısenbi jáne beısenbi kúnderi barlyq qurylym bólimsheleriniń jeke quramy arasynda oqý-deneshynyqtyrý jattyǵýlary ótkizilip, fılıal ákimshiligi oǵan qyzmetkerlerdiń turaqty qatysýyn qatań qadaǵalaıdy», deıdi «ÁTJK» JShS Aqtóbe fılıalynyń dırektory Sarybaı Sársenov.
Aıta ketý kerek, áskerılendirilgen temir jol kúzeti qyzmetiniń tarıhy sonaý Keńes ókimetiniń alǵashqy jyldarynan bastalady. 1921 jyly 9 jeltoqsanda Dzerjınskııdiń bastamasymen qurylǵan áskerılendirilgen temir jol kúzeti sol zamandaǵy nómiri birinshi qatynas quraly ári ekonomıkanyń kúretamyry – temir jol boıyndaǵy qaraqshylyq jáne tonaýshylyqpen shaıqasty. Elimiz Táýelsizdigin jarııalaǵannan bastap áskerılendirilgen temir jol qyzmeti derbes qurylym bolyp ózgerip, áskerılendirilgen kúzet mamandary el ekonomıkasynyń aıaqtan turýyna ózindik úlesterin qosty. 2001 jyldyń 22 qyrkúıeginde Úkimet qaýlysymen «Áskerılendirilgen temir jol kúzeti» ashyq aksıonerlik qoǵamy bolyp qaıta qurylsa, 2020 jyldan bastap «Áskerılendirilgen temir jol kúzeti» jaýapkershiligi shekteýli seriktestigine aınaldy.
Qazirgi ýaqytta temir jol nysandarynyń qaýipsizdigin, júk tasymalyn qadaǵalap, ilespe kúzet qyzmetimen aınalysatyn kópfýnksıonaldy iri kúzet uıymdarynyń birine aınalǵan seriktestiktiń elimizde 10 fılıaly jumys isteıdi. Solardyń biri – Aqtóbe fılıalynyń qyzmet kórsetý aýmaǵy 2040 shaqyrymdy quraıdy. Onyń 165 shaqyrymy Reseı Federasııasy aýmaǵy arqyly ótse, shekara boıyndaǵy júk tasymalyna jaýapty birneshe atqyshtar komandasy, jedel áreket etýshi ońtaılandyrylǵan top, temir jol kópirin kúzetetin arnaıy top bar. Jol boıynda tonaýshylyqty boldyrmaý maqsatynda áskerılendirilgen kúzettiń Aqtóbe fılıaly mamandary bıylǵy jyldyń ózinde 26 vagon tonaý oqıǵasynyń aldyn alyp, júk tonaýmen aınalysqan 33 adamdy ustady.
Búginde Aqtóbe óńirlik fılıalynyń 700-ge jýyq qyzmetkeri bar. Temir jol kúzeti qyzmetiniń kásibı mamany fılıal basshysy Sarybaı Sársenovtiń aıtýynsha, mamandardy jumysqa qabyldaǵan kezde olardyń iskerlik qabileti, kásibı biliktiligimen birge fızıkalyq daıyndyǵy men temir jol qyzmetiniń qyr-syryn bilýine jete den qoıylady. Sol sebepti de elimizdiń Qarýly Kúshterinde qyzmet etip kelgen jas jigitterge osy jumysqa qabyldaýda basymdyq beriledi.
Aqtóbe oblysy
