Jeńimpaz ustazdar júldeli boldy

Aımaq basshysy pedagog­ter­di quttyqtap, ómirin bilim men tárbıege arnaǵan ustazdar qyzmetiniń qashan da qurmetti ekendigin atap ótti.

– Ýaqyt sát saıyn qaı sala­ǵa da jańalyq engizip otyratyny belgili, Sizder jańa tehnologııalarǵa baılanysty ózgeristerge tez beıimdelip, ony bilim berýde sátti júzege asyra aldyńyzdar. Álemdi sharpyǵan pandemııanyń tosyn talaptary da sala ókilderiniń bilim, biligin az synaǵan joq. Osyndaı qıyndyqtarǵa moıymaı, jańa ǵasyrdyń zerdeli urpaǵyn tárbıeleý jolynda talmaı eńbek etip júrgen barshańyzǵa alǵysymdy bildiremin.

Bilim salasy – memlekettik saıasattyń basym baǵyttarynyń biri. Osydan da jyl saıyn pedagogterdi qoldaý aıasy artyp keledi. Bıyl bul salaǵa oblys bıýdjetiniń 45 paıyzy, ıaǵnı 171 mlrd teńgeden asa qarjy qaralyp otyr. El Prezıdenti Qasym-Jomart Toqaev bıyl­ǵy Joldaýynda sala qyzmet­kerleriniń jalaqysyn jyl sa­ıyn kóterýdi tapsyrdy. Prezı­dent tapsyrmasyn oryndaý maqsatynda 2021 jyly oblysqa respýblıkalyq bıýdjetten 32 mlrd teńge bólindi, – dedi oblys basshysy.

Osydan keıin Gúlshara Naýshaqyzy ustazdarǵa túrli deńgeı­degi marapattar tabysta­dy. «Y.Altynsarın» tósbelgi­simen Qarmaqshy aýdany, Baı­qońyr qalasy, №277 mektep-lı­seıi­niń bastaýysh synyp muǵa­limi Aqzııa Baıtóreeva, Qyzyl­orda qalasyndaǵy №176 or­ta mektep dırektory, qazaq tili men ádebıeti pániniń muǵa­li­mi Qadirkúl Shaıma­ǵan­betova, ORDA SCHOOL mek­tebi­niń jetekshisi Raýash Álıeva, M.Má­metova atyndaǵy Qyzylorda pedagogıkalyq joǵary kolledji matematıka pániniń muǵalimi Ǵazıza Sýhanberdına jáne daryndy balalarǵa arnalǵan №10 oblystyq «Bilim-ınnovasııa» lıseı-ınternatynyń qazaq tili men ádebıeti pániniń muǵalimi Naǵısha Esbosyn marapattaldy.

О́ziniń ýaqytyn aıamaǵan, ózgeniń baqytyn aıalaǵandar arasynan 11 muǵalimge «Qyzylorda oblysynyń bilim berý salasyn damytýdaǵy eńbegi úshin jergilikti erekshelik belgisi» tabystaldy.

Oblysta ótken jyldan bas­tap konkýrstyq negizde sala úzdikterine 300 aılyq eseptik kór­setkish mólsherinde qar­jy­laı syıaqy berilip keledi. Bıyl da 10 ustaz «Úzdik pedagog-2021» oblystyq baı­qaýy­nyń jeńimpazy atanyp, 875 myń teńge ıelendi.

Qyzylorda