Keshe Astanada «QazTransGaz» AQ-tyń bas dırektory Serik Sultanǵalı baspasóz máslıhatyn ótkizdi. Ol kompanııanyń ótken jyly atqarǵan jumystarynyń qorytyndylary týraly baıandap, elimizdiń ońtústik óńirlerinde gazǵa baılanysty týyndaǵan máselelerdiń mánisine toqtaldy.
«QazTransGaz» AQ-tyń kompanııalar tobynyń ótken jylǵy tabysyna toqtalar bolsaq, bas dırektordyń aıtýyna qaraǵanda, jyl qomaqty tabyspen qorytyndylanǵan. Naqty sandarǵa nazar salsaq, 2013 jylǵy taza tabys 51 mlrd. teńgeni qurapty. Bul kórsetkish burnaǵy jylǵydan 80 paıyzǵa joǵary kórinedi. Magıstraldy gaz qubyrlary arqyly ónimdi tasymaldaý kólemi 110,14 mlrd. tekshe metrge jetkizilip, 2012 jylǵy kórsetkishten 3,6 paıyzǵa kóp aıdalypty. Al kógildir otyndy shetelderge eksporttaý kólemi eki esege deıin ósken.
Munymen qatar, atalǵan kompanııa ótken jyly áleýmettik ekonomıkalyq máni bar birqatar iri jobalardy júzege sátti asyrypty. Máselen, byltyrǵy qyrkúıek aıynda «Beıneý-Bozaı-Shymkent» magıstraldy gaz qubyrynyń 1143 shaqyrymdyq telimin paıdalanýǵa bergeni málim. Buıyrtsa, bul halyq turmysynyń kóterilýine úlken kómek bolary belgili. Aqtóbe óńiriniń ken oryndarynan osy qubyr arqyly aıdalatyn barlyq gazdy «QazTransGaz» AQ elishilik tutynýǵa, eń aldymen ońtústik ólkege jetkizip turady. Bas dırektor osy jobanyń nátıjeli júzege asyrylýynyń arqasynda Almaty men sol oblystyń jáne Shymkent, Taraz ben Zaısan, sondaı-aq qasıetti Túrkistan qalasynyń turǵyndaryn kógildir otynmen qamtamasyz etý úshin jergilikti ákimdikterge tolyq múmkindik jasalǵanyn tilge tıek etti.
Ońtústik aımaqtarda gazǵa baılanysty ornaǵan jaǵdaı jýrnalısterdiń nazarynan tys qalmady. «Ol keleńsiz jaǵdaı týyndaı salyp tolyq bizdiń baqylaýymyzda boldy. Negizgi sebep, kórshi О́zbekstandy qaharly qystyń qursap alýynan boldy. О́zderine kógildir otyny jetpeı jatqan kórshi el bizge qaraı baǵyttalǵan gaz aǵynyn toqtatýǵa májbúr bolǵan. Biraq bul arada oryn alǵan jaǵdaıǵa QazTransGaz da, kórshi el de kináli emes. Kelisim boıynsha jergilikti ákimdikter qosymsha otyn qoryn iske qosýy kerek edi. Olar osy mindetin der kezinde oryndamady. Sonyń saldarynan jaısyz aqparattar tarap ketti», dep jaýap berdi S.Sultanǵalı. Qazirgi kezde kógildir otynǵa qatysty týǵan máseleler tolyq sheshimin taýyp, qalypty ómir qaıta oralypty.
Tilshilerdiń taǵy bir suraǵy Astanany jáne onyń mańyndaǵy eldi mekenderdi gazdandyrý jobasynyń jaıy týraly boldy. Bas dırektordyń aıtýyna qaraǵanda, ótken aptada Úkimet basshysy Serik Ahmetovtiń qatysýymen bolǵan otyrysta osy másele kóterilip, ótkir qyrlary talqylaýǵa túsipti. Otandyq sarapshy mamandar buǵan deıin qarastyrylyp kelgen Tobyl arqyly Reseı gazyn elordaǵa tartý jobasyn jaramsyz dep taýypty. Sebebi, ol birinshiden, tym qymbat bolsa, ekinshiden, Astanaǵa joǵaryda aıtylǵan «Beıneý-Bozaı-Shymkent» magıstraldy gaz qubyrynan kógildir otyn jelisin tartqan áldeqaıda tıimdi kórinedi. Bul joba ekonomıkalyq táýelsizdigimizdi nyqtaı túsetin kórinedi.
Irgesine gaz qubyry kelip toqtaǵan ońtústik qalalarynda gazdandyrý isiniń nege irkilip turǵany týraly suraq ta kóldeneń tartyldy. Oǵan bas dırektor «Aldyńa ákelip as qoıdym, eki qolyńdy bos qoıdym» dep jaýap berdi. Iаǵnı, QazTransGazdyń mindeti kógildir otyndy qala irgesine jetkizip berý. Ony ári qaraı jergilikti ákimder tartyp alyp ketýi kerek. Bas dırektor jýrnalısterdiń barlyq suraqtaryna jaýap bere kelip, kompanııa qaı kezde de tek halyqtyq múddege qyzmet ete beretinin jetkizdi.
Nurbaı ELMURATOV,
«Egemen Qazaqstan».
