Qazaqstan men Ispanııa – halyqaralyq arenada burynnan tıimdi jumys isteıtin syrtqy saýda jáne ekonomıkalyq seriktester. Tek ótken jyldyń ózinde elder arasyndaǵy taýar aınalymy $1,4 mlrd qurady (eksport – 1,21 mlrd, ımport – 187,7 mln).
Bank delegasııasy ıspan-qazaqstandyq ekonomıkalyq yntymaqtastyǵynyń resmı qarjy quraldary men perspektıvalaryna arnalǵan paneldik sessııaǵa qatysty.
«QDB mıssııasy metallýrgııa, kólik jáne logıstıka, hımııa jáne munaı-hımııa ónerkásibi, energııa óndirý jáne berý, qurylys jáne óńdeý ónerkásibiniń basqa da salalary sııaqty eldiń shıkizattyq emes sektoryn qarjylandyrý arqyly ulttyq ekonomıkanyń ornyqty damýyna járdemdesý bolyp tabylady», dedi QDB Basqarma tóraǵasynyń orynbasary Dýman Áýbákirov.
Sondaı-aq Iskerlik keńes otyrysy aıasynda Damý Banki memlekettik mekemeler - Syrtqy saýda ınstıtýty (ICEX), Resmı kredıt berý ınstıtýty (Instituto de Crédito Oficial, ICO), Ulttyq ınnovasııalyq kompanııa (Empresa Nacional de Innovación, ENISA), sondaı-aq birqatar iri ıspan bankteri (Santander, BBVA, Sabadell jáne Popular) músheleri bolyp tabylatyn aksıonerlik qoǵam retinde jeke-memlekettik áriptestiktiń úlgisin bildiretin ıspandyq damýdy qarjylandyrý kompanııasy – COFIDES-pen yntymaqtastyq týraly Memorandýmǵa qol qoıdy.
«Búgingi tańda Qazaqstanda «COFIDES» tarapynan ınvestısııalyq jobalardy qarjylandyrý úshin qyzyǵýshylyq týdyratyn neǵurlym perspektıvaly sektorlar farmasevtıka jáne agroónerkásip bolyp tabylady. Bul salalardy biz pandemııadan keıingi kezeń men óńirlik habtar qurý maqsatynda Qazaqstannyń geostrategııalyq jaǵdaıyn eskere otyryp iriktep aldyq», dep atap ótti COFIDES ókilderi.
Kezdesý qorytyndysy boıynsha QDB delegasııasynyń basshysy Dýman Áýbákirov pen CESCE eksporttyq-kredıttik agenttigi Basqarmasynyń tóraǵasy Fernando Salazar Palma QDB klıentteriniń, sondaı-aq ıspandyq eksporttaýshylardyń ózara paıdasyna mámileler jasaýdy yntalandyrý jáne júzege asyrýǵa járdemdesý jáne eksporttyq qarjylandyrý salasyndaǵy yntymaqtastyqty nyǵaıtý maqsatynda yntymaqtastyq týraly Memorandýmǵa qol qoıdy. Osylaısha, taraptar bolashaqta ózara tıimdi seriktestik úshin berik negiz qurýǵa nıetti.
«CESCE Qazaqstanǵa ıspan taýarlary men qyzmetteriniń eksportyn qarjylandyrýdy qoldaýǵa nıetti. Usynylyp otyrǵan jobalardy QDB jáne CESCE qabyldanǵan krıterııler men erejelerge sáıkes baǵalaıtyn bolady jáne CESCE qabyldanǵan qaǵıdalar men rásimderge sáıkes árbir jeke kredıt boıynsha ornyn toltyrýdy jeke negizde usyna alady», dep bólisti CESCE ókilderi.
