KIOGE-2021 halyqaralyq munaı jáne gaz kórmesine qatysqan Energetıka mınıstri Maǵzum Myrzaǵalıevtiń aıtýynsha, qazir «QazMunaıGaz» kompanııasy men onyń seriktesteri arasynda atalǵan ken oryndaryn ıgerý tujyrymdamasyn tańdaý boıynsha talqylaý júrip jatyr.
– Otandyq ónim kólemin arttyrý turǵysynan alǵanda bul jobalardyń mańyzy zor. Kúndelikti «QazMunaıGazben» birlesken jumys barysynda atalǵan ken oryndarynyń áleýeti óte joǵary ekenine kózimiz jetip otyr. Jyl sońyna deıin ken ornyn ıgerýdiń tujyrymdamasyn tańdaý boıynsha sheshim qabyldanady. 2028 jylǵa qaraı ken ıgerýdi bastaımyz, – dedi mınıstr.
О́tken aıda Mańǵystaý oblysyna jumys saparymen barǵan Memleket basshysy Qasym-Jomart Toqaev jalpy quny shamamen 5 mlrd dollardy quraıtyn «Qalamqas» jáne «Hazar» iri ken oryndaryn ıgerý jumysyn bastaý jónindegi sheshimdi tilge tıek etken edi. Sondaı-aq Prezıdent ken oryndaryn ıgerý jumystaryna jergilikti kompanııalar men kadrlardy barynsha tartýdyń mańyzdy ekenin atap ótken bolatyn.
M.Myrzaǵalıev Shyǵys Qazaqstanǵa gaz jetkizý jaıyn da baıandady. Aıtýynsha, shyǵysqa jaqyn ýaqytta gaz tartý josparda joq.
– Degenmen atalǵan másele mınıstrliktiń kún tártibinde bar jáne ony Reseımen birlesip sheshý qarastyrylyp otyr. Atalǵan óńirdi gazdandyrýdy kórshi eldiń resýrsy esebinen sheshýge bolady. Ol úshin bólek gaz qubyryn tartý qajet. Shyǵystaǵy Zaısan aýdanyn gazdandyrý jumysy 2013-2014 jyldary bastaldy. Gaz qubyryn tartý josparyna saı 9 eldi mekenge gaz jetkizildi. Búginde jumys jalǵasyp jatyr, – dedi M.Myrzaǵalıev.
Mınıstr dızel baǵasynyń qymbattaýyna qatysty da pikir bildirdi. Onyń aıtýynsha, eldegi dızel otynyn tutyný kólemi tarıhı kórsetkishke jetken. Bıyl tamyz-qyrkúıek aılarynda shamamen 520-540 myń tonna dızel otyny paıdalanylǵan. Bul – elimizde buryn-sońdy bolmaǵan rekordtyq kórsetkish.
– Birden aıtý kerek, dızel otyny men basqa da janar-jaǵarmaı túrleriniń baǵasy rettelmeıdi. Baǵany suranys pen usynysqa súıene otyryp naryq retteıdi. Sondyqtan mınıstrlik baǵany belgileýge aralasa almaıdy. Búginde munaı baǵasynyń óskeni baıqalady. Bir-eki kúnniń ishinde barreli 78 dollardan 82 dollarǵa deıin ósti. Árıne, munaı baǵasynyń ózgerýi janar-jaǵarmaıdyń baǵasyna áser etedi, – dedi ol.
Mınıstr búginde dızel otynyn jetkizý ótkir máselege aınalǵanyn moıyndady. Aıtýynsha, onyń birneshe sebebi bar.
– Biz elimizge dızel otynyn jetkizý men tutyný kóleminiń artqanyn baıqap otyrmyz. Qazan aıynda Reseıden kem degende 100 myń tonna dızel otynyn ákelý mindeti tur. Qyrkúıek aıynyń 20 kúninde elimizge 5 myń tonna dızel otyny jetkizilse, qalǵan 10 kúnniń ishinde 15 myń tonna ónim ákelindi. Al qazan bastalǵaly 4 kúnniń ishinde Qazaqstanǵa 12 myń tonna dızel otyny keldi. Qazirgi ýaqytta atalǵan otyn túrin jetkizý máselesi – kún tártibinde jáne baqylaýda. Jalpy, ımporttyq otyndy jetkizý men tutyný trendine oń baǵa berýge bolady, – dedi M.Myrzaǵalıev.
