Biz atalǵan teatr dırektorynyń shyǵarmashylyq jónindegi orynbasary, Qazaqstannyń eńbek sińirgen qaıratkeri Jalǵas Tolǵanbaıdy áńgimege tartyp, shaǵyn suhbat qurǵan edik.
«Byltyr myna indettiń kesirinen eshqaıda shyǵa almadyq. Bıyl Mádenıet jáne sport mınıstrliginiń ruqsatymen aldymen Kókshetaý qalasynda bolyp, endi, mine, Qyzyljar qalasynda gastroldik saparmen júrmiz. Munda kelmegenimizge jıyrma jylǵa jýyqtaǵan. Budan buryn, 2003 jyly «Qazaqstannyń Reseıdegi jyly» bolǵanda Omby qalasyna baryp, jol-jónekeı osynda úsh spektakl qoıǵanbyz. Halyqtyń ystyq yqylasyna qaraǵanda, sahna sańlaqtaryn saǵynyp qalǵandary kórinip tur. Bul joly teatrymyzdyń birneshe janrdy qamtyǵan eń jaqsy spektaklderin alyp keldik. Sonyń ishinde D.Isabekovtiń «Jaýjúrek», M.Jumabaevqa arnalǵan «Júz jyldyq mahabbat», T.Nurmaǵanbetovtiń «Bes boıdaqqa bir toı», A.Volodınniń «Qoshtasqym kelmeıdi», I.Saparbaıdyń «Syǵan serenadasy» spektaklderi jáne teatrymyzdyń jas rejısseri Juldyzbek Jumanbaıdyń qoıylymyndaǵy Abaıdyń qarasózderine qurylǵan «Qara» ınssenırovkasy bar. Sonymen birge ózimizdiń teatrymyzdyń talantty aktrısalary Nazgúl Qarabalına (ıdeıa avtory) men Baıan Qajynábıeva daıyndaǵan «Týǵan kún» atty bir akterdiń oryndaýymen qoıylǵan monospektakldi ákeldik. Ony S.Muqanov atyndaǵy qazaq teatrynda qoıdyq. Kún sýyqtaý bolsa da halyqtyń eljirep, júrek jylýyn syılaǵanyn kórdik. Sondyqtan barlyq kórermenge, sonyń ishinde aýyl-aýdandardan arnaıy kelgen aǵaıynǵa, bizdi qýana qarsy alyp, qurmet kórsetip jatqan oblys basshylyǵyna, barlyq máselemizdi sheship bergen orys jáne qazaq teatrynyń dırektorlary Spartak Ramazanov pen Birjan Jalǵasbaevqa aıtar alǵysymyz sheksiz», dedi ol.
Ákemteatr Qyzyljarǵa indetke baılanysty ónerpazdarynyń 60 jasqa deıingi orta býyn ókilderin ǵana ákelgen eken. Sondyqtan trýppany quraǵan alpysqa jýyq adamnyń negizgi bóligi jastar. Olardyń arasynda Bekjan Turys, Dýlyǵa Aqmolda, Asylbek Boranbaı, Darııa Júsip, Shynar Asqarova, Gúlnár Jaqypova sııaqty esimderi elge tanymal akterler bar. Solardyń ishinde jerlesimiz Kúnsulý Shaıahmetova da boldy. «Teatr ǵana emes, kıno, radıo, dýblıaj sııaqty ónerdiń barlyq salasyn meńgergen, ózindik úni bar jerlesterińizge halyqtyń yqylasy da erekshe ekenin kórdik. Ol sahnaǵa shyqqanda halyqtyń qurmeti, uzaq soqqan shapalaǵy aıryqsha boldy. Keshe týyp-ósken aýdanynyń ákimi de kelip, halyq atynan ol kisige arnaýly syı-sııapatyn jasady», dedi Jalǵas Tolǵanbaı.
Teatrdyń gastroldik saparyn bastap kelgen dırektory, belgili óner qaıratkeri Erkin Jýasbek. Qyzyljarlyqtar M.Áýezov teatrymen qımaı qoshtasady. Tek úzilis uzaqqa sozylmaı, shynaıy daryndar jıi kelip tursa degen tilek aıtylady.
