Beınebaılanys rejıminde ótken kezdesý barysynda Qazaqstan men Azııa damý banki arasyndaǵy yntymaqtastyqtyń perspektıvalary talqylandy.
Qasym-Jomart Toqaev Masasýgý Asakavany qarjy ınstıtýtynyń basshysy laýazymyna saılanýymen quttyqtap, Azııa damý bankiniń Qazaqstannyń áleýmettik-ekonomıkalyq damýyna qosqan úlesin joǵary baǵalady.
«27 jyl ishindegi yntymaqtastyq aıasynda Azııa damý banki Qazaqstannyń ekonomıkasyna 6 mıllıard dollarǵa jýyq ınvestısııa quıdy. Bul qarjy aıtarlyqtaı qomaqty jáne yntymaqtastyǵymyzdyń tabysty damyǵanyn aıǵaqtaıdy. Aradaǵy yntymaqtastyqty joǵary baǵalaımyz jáne uzaqmerzimdi ári ózara tıimdi baılanystardy qoldaýǵa nıettimiz», dedi Memleket basshysy.
Sondaı-aq kezdesýde 2022-2026 jyldarǵa arnalǵan Qazaqstan men Azııa damý banki arasyndaǵy seriktestiktiń jańa Strategııasyn ázirleý máselesine erekshe mán berildi.
«Azııa damý bankiniń Qazaqstanǵa qatysty jańa Strategııasynda bizdiń ulttyq basymdyqtarymyz ben josparlarymyz, sondaı-aq memlekettik basqarýdyń jańa úlgisi, ekonomıkany ártaraptandyrý jáne jasyl ekonomıkalyq ósim, teńgerimdi aýmaqtyq damý, saýda-ekonomıkalyq yntymaqtastyq, sıfrlandyrý máseleleri tolyq eskeriletinine senimdimin», dedi Qasym-Jomart Toqaev.
Qazaqstan Prezıdenti Azııa damý bankiniń basshysyna elimizdegi ishki jalpy ónim deńgeıiniń artqany, ınflıasııaǵa qarsy qabyldanǵan sharalar, kólik-logıstıka ınfraqurylymyn damytý, shaǵyn jáne orta bızneske kórsetilip otyrǵan qoldaý sharalary týraly aıtty.
О́z kezeginde Masasýgý Asakava Qazaqstandaǵy pandemııaǵa qarsy qabyldanǵan sharalarǵa oń baǵa berdi.
«COVID-19 indetine qarsy baǵyttalǵan kúsh-jigerlerińiz týraly habardarmyn. Úkimetterińiz belsendi sharalardy júzege asyryp, vırýstyń órshýin tejeý úshin naqty sheshimder qabyldap otyr. El ekonomıkasyna jáne halyqtyń ál-aýqatyna keri áser etken pandemııanyń saldaryn jeńildetý maqsatynda ishki jalpy ónimniń 9,5 paıyz kólemindegi daǵdarysqa qarsy sharalardyń aýqymdy paketin qabyldaǵanyńyzdy qoldaımyz», dedi Azııa damý bankiniń basshysy.
