Memleket basshysy kómirsýtegin sapaly óńdeý isi búginde Qazaqstannyń munaı-gaz salasyndaǵy basym baǵyttarynyń biri ekenin atap ótti.
Prezıdent polıpropılen jáne polıetılen óndirisi jónindegi jobalarǵa qatysty yntymaqtastyq týraly kelisimge qol qoıylýyn quptady. Bul jobalardy «Samuryq-Qazyna» men «QazMunaıGaz» kompanııalary júzege asyryp jatyr. Qasym-Jomart Toqaev atalǵan kelisimdi Qazaqstan men Reseıdiń seriktestik qarym-qatynastaryn odan ári nyǵaıtýǵa tyń serpin beredi dep sanaıdy.
– Seriktestigimizdiń bastalǵanyna qýanyshtymyz. Sizder munaı-hımııa kesheniniń qurylysyna qatysty máselelermen birlesip aınalysasyzdar. Qazaqstan Úkimeti meniń tapsyrmam boıynsha jobalardy iske asyrýǵa jan-jaqty kómek kórsetedi. Biz is júzinde naqty nátıjege qol jetkizýge tıispiz. Jýyrda ótken Qazaqstan men Reseıdiń О́ńiraralyq forýmynda Vladımır Pýtın ekeýmiz eki el arasyndaǵy ekonomıkalyq yqpaldastyq máselelerin muqııat zerdeleýge jáne naqty nátıjelerge qol jetkizýge kelistik, – dedi Memleket basshysy.
«SIBÝR Holdıng» kompanııasynyń basshysy Dmıtrıı Konov Qasym-Jomart Toqaevqa Qazaqstanmen aradaǵy yntymaqtastyqtyń perspektıvalary men Reseıdegi birikken iri munaı-gaz kompanııasynyń damý jospary týraly aıtty.
– Búginde Qazaqstanda polıpropılen óndirý jobasy boıynsha jaqsy baza qalyptasqan. Onyń qurylysy aıaqtalýǵa jaqyn. Qazirgi kezeńde kadrlardy daıarlaýǵa kómektesýdiń tıimdiligin kórip otyrmyz. Bul baǵyttaǵy jumystardy bastap ta kettik. «QazMunaıGaz» kompanııasynyń 100-ge jýyq qyzmetkeri daıyndyqtan ótti, bul jumysty jalǵastyra beremiz, – dedi Dmıtrıı Konov.
Onyń aıtýynsha, «Sıbýr» kompanııasy munaı-gaz hımııasy salasyndaǵy basqa da jobalarǵa qatysýǵa daıyn.
