Jıyn barysynda oblystyq Tilderdi damytý basqarmasynyń basshysy Gúljan Meńdekenova uly aqyn Abaı Qunanbaıulynyń, Alash kósemderi Álıhan Bókeıhanuly, Ahmet Baıtursynuly men Mirjaqyp Dýlatulynyń, uly aǵartýshy Ybyraı Altynsarınniń esimderin mektepterge berý týraly usynys jasady.
– О́skeleń urpaq ultymyzdyń uly tulǵalarynyń esimderin qadirlep, olardyń asyl murasyn boıyna sińirip ósýge tıis. Mektep – jastarǵa sapaly bilim beretin altyn uıa ǵana emes, sonymen qatar balanyń boıynda elshildik rýhty, Otanǵa degen súıispenshilik sezimin qalyptastyratyn tálim-tárbıeniń altyn besigi, – dedi basqarma basshysy.
Depýtattar baıandamashynyń usynysyn biraýyzdan qoldap, bekitti.
Sonymen, máslıhat sessııasynda Abaı Qunanbaıulynyń esimin oblystaǵy 4 bilim ordasyna, atap aıtqanda Qostanaıdaǵy №27 mektepke, Jitiqaradaǵy №3 mektep-lıseıge, Rýdnyıdaǵy №18 jáne Lısakov qalasyndaǵy №3 mektepke berý týraly sheshim qabyldandy.
Alash kósemi Álıhan Bókeıhannyń esimin Qostanaı qalasyndaǵy №29 mektep, Arqalyqtaǵy «Rodına» orta mektebi jáne Qashar kentindegi №2 mektep ıelenbek. Al Rýdnyı qalasyndaǵy №19 mektepke Ahmet Baıtursynulynyń, osy qaladaǵy №15 mektepke Mirjaqyp Dýlatulynyń esimi beriletin bolady. Sondaı-aq taıaýda ǵana Qarasý aýdanynda ashylǵan qazaq orta mektebine Ybyraı Altynsarınniń esimi berilmek.
