Qala ákiminiń orynbasary Erjan Babaqumarov shaharda jedel járdemniń aýrýhanaǵa jatqyzý róli ózgeretinin, derttiń aýyrlyǵy men epıdemııa qarqynyna baılanysty ınfeksııalyq stasıonarlardyń jumysy úsh eshelonǵa bólinetinin jetkizdi.
«Almatyda BSMK jumysy qaıta jasaqtaldy, onda 364 mobıldi brıgada qurylyp, ýchaskelik dárigerlerdiń áleýeti kúsheıtildi, emhanalarǵa qosymsha 70 mashına berildi. Byltyr qurylǵan Telemedısına ortalyǵy arqyly pasıentterdi úıde emdeýge baqylaý jasaldy», dedi E.Babaqumarov.
Almatyda ólim-jitimmen kúresý úshin qalanyń shtattan tys bas reanımatology bastaǵan biryńǵaı reanımasııalyq top jumys isteıdi jáne ol qalanyń barlyq reanımasııalarynyń jumysyna jetekshilik etedi. Budan ózge, qalada táýliktik qýaty 16 myń zertteýge deıingi 28 PTR-zerthananyń ortalyqtandyrylǵan jelisi (jáne 27 myńǵa deıin ulǵaıtý múmkindigi bar), 14 IFT-zerthana jumys isteıdi. Sondaı-aq Almatyda 28 KT-ortalyqtan turatyn jalpyqalalyq jeli quryldy. Sondaı-aq qarjy dárilik zattar men JQQ rezervin qurýǵa, jappaı vaksınalaýdy uıymdastyrýǵa tartylatyn mamandardyń eńbekaqysyn tóleýge, medısına qyzmetkerlerine ústemeaqy tóleýge, Anestezıologııa jáne reanımatologııa ortalyǵynyń jumys isteýine baǵyttalǵan.
Almatyda KVI-diń táýliktik ósimi 25 tamyzdan bastap 1,16-dan 0,2%-ǵa deıin tómendedi. Jalpy, indet juqtyrý shamamen 74%-ǵa tómendedi. Jyl basynan beri qalada 152 myńnan astam adam indet juqtyrsa, 19 shilde men 6 qazanǵa deıin 85 myń jaǵdaı tirkelgen.
«2020 jyldyń jazynda jáne 2021 jyldyń basynda «Ýhan» shtamy ýshyqtyrǵan eki tolqynnan óttik. 2021 jyldyń kókteminde – «Alfa» shtamynan óttik. Bıyl 19 shildede «Delta» shtamynyń saldarynan indettiń eń aýyr tolqyny bastaldy. Búginde bul jaǵdaıdan da shyqtyq», deıdi E.Babaqumarov.
Eger 29 shilde men 25 tamyz aralyǵynda Almaty táýligine 1500-1600 adamnyń indetke shaldyqqany anyqtalsa, 26 tamyzdan beri epıdemııalyq ahýaldyń beti beri qarady. Salystyrmaly taldaý kórsetkendeı, birinshi tolqyn kezinde Almatyda táýligine juqtyrǵandar sany 250 bolsa, ekinshi jáne úshinshi tolqynda shamamen 400-700 aralyǵynda terbelip, «Delta» shtamyn da táýligine juqtyrǵandar sany 1600, tipti odan da kóp boldy. «Deltanyń» sharyqtaý sheginde jedel járdemge júginý eki esege, ıaǵnı 4 myńǵa deıin ósti, onyń 45%-y KVI jáne kovıdti etıologııanyń pnevmonııasymen baılanysty boldy.
Pandemııanyń tórtinshi tolqyny stasıonarlarǵa jatýǵa májbúr bolǵan naýqastar sanyn 5 esege deıin kóbeıtti. Eger birinshi tolqynda aýrýhanaǵa jatqyzý táýligine 250 adamǵa deıin, ekinshi jáne úshinshi tolqyn kezinde – 400-450-ge deıin bolsa, tórtinshi tolqyn kezinde aýrýhanaǵa jatqyzý deńgeıi eki ese joǵary boldy jáne táýligine 800 pasıentke jetti.
«Jalpy, densaýlyq saqtaý júıesi mundaı salmaqqa tótep berdi, dári-dármekter men JQQ qory jetkilikti qamtamasyz etilip, irkilister bolǵan joq», deıdi qala ákiminiń orynbasary.
Almatyda indettiń tórtinshi sharyqtaý shegine jetkende 10 myńǵa jýyq ınfeksııalyq tósektik oryn daıyndalsa, onyń 9 myńǵa jýyǵy toldy, «Delta» tolqynynyń sharyqtaý sheginde onyń júktemesi 70%-ǵa deıin boldy. Búginde ınfeksııalyq stasıonarlarda 3 179 tósektik oryn bar, onyń 41% paıyzy bos emes.
«KVI-diń sharyqtaý sheginde reanımasııalyq tósektik oryndardy 730-ǵa deıin arttyrdyq. Osy kezeńde onyń júktemesi 70%-ǵa jetti. Infeksııalyq stasıonarlardyń jansaqtaý bólimshelerine tamyz aıynda 2030 pasıent tústi. Almatynyń reanımasııalyq bólimshelerine basqa qalalardan túsken pasıentter sany 33% boldy», deıdi E.Babaqumarov.
«Qazir biz ahýaldyń turaqtalǵanyn kórip otyrmyz. Qyrkúıek aıynda reanımasııalyq naýqastar arasyndaǵy ólim-jitim tamyzǵa qaraǵanda 18%-ǵa tómendedi. Biraq aýyr naýqastardyń sany kemimeı jatyr. Bul pasıentterdiń RITB-de uzaq – 1 aıdan astam bolýyna baılanysty», dedi E.Babaqumarov.
Derttiń sharyqtaý sheginde úı stasıonarynda 15 myńǵa jýyq adam boldy, búginde olardyń sany – 3 500.
«Pandemııaǵa qaramastan, 9 qalalyq jáne 39 jeke stasıonardy, sondaı-aq 13 respýblıkalyq uıymdy paıdalana otyryp, turǵyndarǵa tolyq kólemde josparly kómek kórsetýge tyrystyq. Qazir kópsalaly klınıkalar burynǵy jumys rejimine qaıta oraldy», deıdi qala ákiminiń orynbasary.
