Búgingi Úkimettiń kezekti otyrysynda Ulttyq bank tóraǵasy Erbolat Dosaev álemdik ekonomıka qalpyna kele bastaǵandyqtan shıkizat baǵasy óskenin atap ótti.
«Osy jyldyń tamyzynda ónerkásiptik shıkizat quny negizinen Qytaı men damyǵan elder tarapynan joǵary suranysqa baılanysty bazalyq metaldardyń 42,6%-ǵa qymbattaýy esebinen 38,5%-ǵa ósti. Osy kezeńde aýyl sharýashylyǵy shıkizaty 22,7%-ǵa qymbattady.
Bıylǵy qyrkúıekte ósimdik maıy, dándi daqyldar, sút ónimderi men qant baǵasynyń kóterilýi nátıjesinde BUU-nyń Azyq-túlik jáne aýylsharýashylyq uıymy (FAO) azyq-túlik baǵalarynyń ındeksi 130%-ǵa deıin ósti. Bir jyl ishinde FAO ındeksi 32,8%-ǵa kóterilgen.
Baltic Dry Index baǵalaýy boıynsha 2019 jylǵy jeltoqsanmen salystyrǵanda baǵasy 5,4 ese, 2020 jylǵy mamyrmen salystyrǵanda – 10 ese ósken», deıdi bas qarjyger.
Al baıandamada Qazaqstanda ınflıasııa 8,9% ekeni aıtyldy. Sońǵy bir aıda et (1,3%), ósimdik maıy (0,6%) jáne qant (1,1%) baǵasynyń ósýine baılanysty 11,4%-dan 11,5%-ǵa deıin óskeni aıtyldy.
«Azyq-túlikke jatpaıtyn ınflıasııa qyrkúıekte dızel (bir aıda 3,8%), gaz (0,9%) jáne kómir (1,9%) baǵasynyń kóterilýi aıasynda 7,3%-ten 7,5%-ke deıin 0,2 paıyzdyq tarmaqqa ósti. Janar-jaǵar maıdyń qymbattaýy dándi-daqyldar baǵasynyń ósýine alyp keldi. Buǵan qosa, kórshi elderdegi baǵanyń qymbattaýy da tikeleı áser etip otyr», deıdi Ulttyq bank tóraǵasy.
Belgili bolǵandaı. Ulttyq bank ınflıasııa dálizin 7,5-8,5%-ǵa qaıtarýǵa kúsh salýda.
