Qaı kezde de «Jastar qalasy» sanalyp kelgen Almatynyń jastar saıasatyn damytýdyń 2025 jylǵa deıingi óńirlik jospary bar. Osy bastama aıasynda 125-ten astam is-sharany iske asyrý kózdelgen.
Sonymen jýyrda onlaın rejimde jastar uıymdary ókilderiniń qatysýymen Almaty qalasy ákimi janyndaǵy Jastar isi jónindegi keńes otyrysy ótti.
Otyrysta Almaty jastarynyń damýyna áser etetin ózekti máseleler talqylandy. Olardyń ishinde ózin ózi júzege asyrý, jeke kásipkerlikti bastaý men júrgizý, nátıjeli jumyspen qamtý, sapaly bilim alýdyń qolda bar múmkindikteri, sondaı-aq jastardyń ómir súrý sapasyn arttyrýǵa baǵyttalǵan jańa áleýmettik jobalardy iske asyrýda qala ákimdigimen birlesken jumysqa qatysý jaıy qaraldy.
Jıyn barysynda atap ótilgendeı, júrgizilgen áleýmettik zertteýlerdiń qorytyndysy boıynsha Almaty jastarynyń óz ómirine qanaǵattaný ındeksi jaman emes. Mektep (14-17 jas: 71,7%) jáne stýdent (18-21 jas: 74,0%) jastary arasynda ómirge qanaǵattaný deńgeıi eń joǵary kórsetkishke jetti. Oń baǵalar Naýryzbaı (71,8%), Jetisý (69,7%) jáne Bostandyq (68,9%) aýdandarynyń turǵyndary arasynda basym.
Resmı derekterge súıensek, Almaty jastarynyń árbir ekinshi ókili jumyspen qamtylǵan – 63,7%. Qazirgi jumysy jastardyń 64,4%-yn qanaǵattandyrady. Bul rette kásipkerlik iske múddeliliktiń joǵary deńgeıine qaramastan, ózin ózi jumyspen qamtý qazirgi tańda jastardyń árbir on birinshisine (8,6%) tıesili.
Jalpy, taldaý qorytyndysy boıynsha jumystyń 5 negizgi baǵyty aıqyndaldy: sapaly bilim berý, jumysqa ornalastyrý jáne jumyspen qamtý, qoljetimdi turǵyn úı jáne kásipkerlikti damytý, ataýly-profılaktıkalyq jumys, salamatty ómir salty.
Qalanyń qoǵamdyq damý basqarmasy basshysynyń orynbasary R.Bekbergenov jumystyń basym baǵyttarynyń biri – NEET sanatyndaǵy jastardy jumyspen qamtýdyń belsendi nysandaryna tartý ekenin aıtty. Osylaısha, júıeli jumys aıasynda bıyl Jumyspen qamtý ortalyǵy arqyly 6 404 jas turaqty jumys oryndaryna ornalastyrylǵan. Tehnıkalyq jáne kásiptik bilim berý uıymdaryna 390 stýdent qabyldansa, 8 634 adam jumyspen qamtýǵa járdemdesýdiń ózge de belsendi nysandaryna jiberildi, onyń ishinde jastar praktıkasy, qysqa merzimdi kásiptik oqytý, «birinshi jumys orny» jobasy bar. Sondaı-aq 900 jas «Jasyl el» jobasy aıasynda ýaqytsha jumysqa ornalastyrylady. Jastar resýrstyq ortalyqtarynyń janynda NEET sanatyndaǵy jastarmen jumys jónindegi arnaıy shtab jumys isteıdi.
Arnaıy mobıldik toptar jeke jumys júrgizip otyr. Olardyń maqsaty – adam kóp jınalatyn jerlerde qalalyq jumyspen qamtý baǵdarlamalaryna qatysý múmkindikterin túsindirý. Búgingi tańda mobıldi toptar aýdandyq jumyspen qamtý ortalyqtarymen birlesip, qalanyń barlyq aýdanynda 20 myńnan astam adamdy qamtı otyryp, 55-ten astam aksııa ótkizdi. Osyǵan uqsas jumysty qalanyń bazar ókilderi birlesip júrgizedi, onda arnaıy jastar pýnktterin ashý josparlanýda. Sonymen qatar, onlaın formatta jumyspen qamtý boıynsha ataýly jumys júrgizý máselesi qosymsha pysyqtalyp jatyr.
Otyrys barysynda keńes músheleri jumyspen qamtýǵa járdemdesý, kásipkerlikti damytý, jastar arasyndaǵy quqyq buzýshylyqtardyń aldyn alý baǵyttary boıynsha naqty usynystar jasady.
Otyrys sońynda qala ákiminiń orynbasary Erjan Babaqumarov jastar qoǵamdastyǵyn, onyń ishinde jastar uıymdarynyń kóshbasshylaryn qala ákimdigi janyndaǵy jumys isteıtin mamandandyrylǵan jumys toptarynyń quramyna qosý arqyly ózara is-qımyldy kúsheıtýdi usyndy.
Jumys kezdesýiniń qorytyndysy boıynsha 2022 jylǵa arnalǵan birlesken is-qımyl jospary ázirlenedi. Basym baǵyttardyń ishinde jas almatylyqtarǵa kásiptik baǵdar berý boıynsha konsýltasııalyq kómek kórsetýge, olardy qaıta oqytý jáne kadrlardy qaıta daıarlaý baǵdarlamalaryna tartýǵa, sondaı-aq kámeletke tolmaǵandarmen ózara is-qımyl tásilderin jetildirýge basa nazar aýdaryldy. Jastardyń kásipkerlikke qyzyǵýshylyǵy joǵary ekendigi eskerile otyryp, bıznes júrgizý úshin qolda bar múmkindikter men memlekettik qoldaýdyń qoljetimdi sharalaryn túsindirý jumystaryn kúsheıtý uıǵaryldy.
