Aldyna jan salmady
Bul kúnderi Omanda ústel tennısinen jasóspirimder arasynda ótip jatqan halyqaralyq týrnırde Alan Qurmanǵalıev tabysty óner kórsetýde.
14 jastaǵy Qaraǵandy qalasynyń týmasy bıylǵy jyldyń qańtar aıynda uıymdastyrylǵan eresekter arasyndaǵy Qazaqstan chempıonatynda bas júldeni oljalap, maıtalman mamandar men barsha jankúıerdiń nazaryn ózine aýdarǵan edi. Oǵan deıingi rekordtyq kórsetkish elimizdiń birinshi raketkasy Kırıll Gerasımenkoǵa tıesili edi. Ataqty jerlesimizdiń 2012 jyly 15 jasynda qarsylastaryn sypyra utqany esimizde. Mine, sol nátıjeni jańartqan Alan qazirgi kezde túrli halyqaralyq dodada óziniń tyrnaqaldy tabystaryna qol jetkizip júr.
Arab túbeginde ótken jarysta Alan Qurmanǵalıev jeńis tuǵyryna eki ret kóterildi. Ol 17 jastaǵy oıynshylar arasynda kúmis medaldi ıelense, 15 jastaǵylardyń saıysynda bas júldeni oljalady.
Ekinshi kezeńge shyqty
Tennısten Ispanııanyń Alıkante qalasynda «Chellendjer» sanatyndaǵy halyqaralyq týrnır bastaldy.
Birinshi aınalymda Qazaqstannyń eki ókili – Dmıtrıı Popko men Denıs Evseev ózara sheberlik baıqasty. Qazirgi kezde ATR reıtınginde alǵashqysy 164-orynda tursa, ekinshisi 406-satyǵa jaıǵasqan. Bir-biriniń qyr-syryn jaqsy biletin oıynshylar birinshi sette ábden tiresti. Tipti sońǵy upaıǵa deıin talasyp, berispeýge bekindi. Asa shıelenisti ótken saıys taı-breıkke deıin ulasyp, 7:6 esebimen Denıstiń paıdasyna sheshildi. Ekinshi sette de ol óziniń ústemdigin pash etti – 6:4. Osylaısha, 1 saǵat 54 mınýtke sozylǵan saıys Evseevtiń jeńisimen aıaqtalyp, ol kelesi aınalymǵa ótti. Endi jerlesimiz О́zbekstannyń tanymal tennısshisi, ATR týrnırleriniń eki dúrkin jeńimpazy Denıs Istomınmen kezdesedi.
Al Tımofeı Skatov Italııanyń Neapol qalasynda ótip jatqan týrnırdiń tusaýkeser kezdesýinde ıspanııalyq Alvaro Lopes San-Martınge ese jiberdi – 3:6, 2:6.
Kıtakıýsıýde kúsh synasady
18-25 qazan aralyǵynda Japonııanyń Kıtakıýsıý qalasynda sporttyq gımnastıkadan álem chempıonatynyń jalaýy jelbireıdi.
Aıtýly dodada 60-qa jýyq memleketten 300-den asa sportshy qatysady dep kútilýde. Solardyń qatarynda Qazaqstannyń ulttyq quramasy da bar. Sońǵy daıarlyq jumystaryn Reseıdiń Penza qalasynda pysyqtaǵan otandastarymyz Kúnshyǵys eline saqadaı saı ázirlikpen attanǵaly otyr. Bul básekede el namysyn bes sportshy qorǵaıdy. Olar – Mılad Karımı, Narıman Qurbanov, Ilııas Ázızov, Farýh Nábıev jáne Ilfrat Imardjanov. Erejege saı bir snarıadta ár komanda sapynda úsh sportshydan baq synaıdy. Al erkin jattyǵýda Mılad, Ilııas jáne Farýhqa senim artylyp otyr.
Komandanyń bas bapkeri Aleksandr Kımniń aıtýynsha, bizdiń jigitter kópsaıys, erkin jattyǵý, gımnastıkalyq at jáne kermedegi jattyǵý saıystarynda fınalǵa ótýdi kózdeıdi. Al basty maqsat – Japonııada bir júldege qol jetkizý.
