Joba qala turǵyndaryn sporttyń 11 túrine úıretedi, onda 8 jerde 84 nusqaýshy sabaq ótkizedi.
Nur-Sultan qalasy ákimdiginiń qoldaýymen, sol sııaqty qalalyq dene shynyqtyrý jáne sport basqarmasynyń uıymdastyrýymen barlyq sabaq tegin ótedi. Joba 2021 jyldyń jeltoqsan aıynyń sońyna deıin jalǵasady.
Sabaqtar 6 saıabaq pen 2 skverde mynadaı sport túrleri boıynsha ótkiziledi: júgirý, karate, skandınavııalyq júris, asyq atý, strıtbol, badmınton, fıtnes, zýmba. Sabaqtar apta saıyn seısenbi, beısenbi, senbi kúnderi saǵat 17:00-den 19:00-ge deıin ótedi.
«Qoljetimdi sport túrleriniń biri - asyq atý ulttyq oıyny. Oǵan kez kelgen jastaǵy turǵyndar qatysa alady. Bul ulttyq sport túri, ony alty jastan asqandar oınaı alady», dedi Nur-Sultan qalasynyń «Asyq oıyny» federasııasynyń prezıdenti Eskendir Rahmetov.
Aıta ketý kerek, joba Memleket basshysynyń «Halyq birligi jáne júıeli reformalar – el órkendýiniń berik negizi» atty Qazaqstan halqyna Joldaýynyń mindetterin iske asyrý aıasynda ázirlendi. Baǵdarlamalyq qujatta Prezıdent dene shynyqtyrýdy damytýǵa erekshe nazar aýdaryp, buqaralyq jáne balalar sportymen aınalysý úshin barlyq jaǵdaıdy jasaýdy tapsyrdy.
Esterińizge sala keteıik, jobanyń saltanatty ashylýy ótken demalys kúnderi Astanalyq saıabaqta «World Class Green» fıtnes-ortalyǵynyń fıtnes-nusqaýshylary men «Azimuth» sport klýby sportshylarynyń kórsetilimderi ótti. Sonymen qatar saıabaqqa kelgen demalýshylar arasynda asyq atý oıyny boıynsha jattyǵýlar ótkizildi.
