Bıyl kórmege kelgen eksponentterdiń 60%-y sheteldikter. Sarapshylar bul halyqaralyq bıznes qaýymdastyqtyń bizdiń elimiz ashatyn múmkindikterge degen joǵary qyzyǵýshylyǵy men senimin kórsetedi dep esepteıdi. Aýqymdy jobanyń ashylý saltanatynda Indýstrııa jáne ınfraqurylymdyq damý vıse-mınıstri Berik Kamalıev Úkimet basshysy Asqar Mamınniń quttyqtaý hatyn oqyp berdi.
«Qazaqstan Eýrazııa qurlyǵynyń mańyzdy Kólik jelileriniń ortasynda ornalasa otyryp, Azııa men Eýropa arasyndaǵy tranzıttik kópir men senimdi seriktes ekenin kórsetti. Muny kórme men konferensııaǵa qatysýshylardyń halyqaralyq quramy dáleldeıdi. «Translogistica Kazakhstan-2021» halyqaralyq kórmesi tranzıttik-kólik áleýetin damytýǵa, uzaqmerzimdi jáne ózara tıimdi seriktestik qatynastardy odan ári nyǵaıtýǵa úles qosatynyna senimdimin», delingen quttyqtaýda.
«TransLogistica Kazakhstan- 2021» kórmesi Ortalyq Azııa óńirinde bıznes áriptestiktiń aýqymyn keńeıtý arqyly jańa ónimder men qyzmetterdi iske qosý áleýetin arttyryp otyr. Is-sharaǵa qatysýshy taraptar ózara tájirıbe almasyp, tranzıttik baǵytty odan ári jandandyrý máselelerin birlese talqylady. Pandemııa kezeńi kólik dálizderiniń áleýmettik qajettiligi men ekonomıkalyq tıimdiliginiń mańyzyn kórsetip berdi. Bul elimizdegi ınvestısııalyq tartymdylyqty kúsheıtýge de yqpal etkeni málim.
«Qazaqstan kólik salasyn jáne kólik dálizderiniń tranzıttik áleýetin damytý úshin zor kúsh-jiger jumsaýda. Úkimet pen Indýstrııa jáne ınfraqurylymdyq damý mınıstrligi birqatar salalyq baǵdarlamany iske asyrdy, salanyń quqyqtyq negizi qalyptasty, kólik qyzmetterin kórsetý úshin qolaıly básekelestik orta quryldy. Sońǵy 15 jylda elimizdiń kólik salasyna shamamen 35 mlrd dollar salyndy», dep atap ótti vıse-mınıstr B.Kamalıev.
Júk tasymaldarynyń kedergisiz ótýi úshin tranzıttik dálizderdi jańǵyrtýǵa erekshe kóńil bólinedi. Búginde Qazaqstan arqyly 11 halyqaralyq tranzıttik dáliz ótetin bolsa, onyń 5-eýi temir jol jáne 6-ýy avtomobıl joldaryna tıesili. Respýblıkalyq, oblystyq jáne aýdandyq mańyzy bar avtomobıl joldarynyń jalpy uzyndyǵy shamamen 100 myń shaqyrym, al temir joldyń uzyndyǵy 21 myń shaqyrymdy quraıdy.
Qazaqstandaǵy 20 áýejaıdyń 18-i IKAO talaptaryna sáıkes dep tanylǵan. Bıyl 2-11 tamyz aralyǵynda ótkizilgen ICVM sheńberinde IKAO ushý qaýipsizdiginiń halyqaralyq standarttaryna sáıkestik deńgeıi (84%-ǵa deıin) artyp otyr. IKAO-nyń obektıvti baǵalaýy saladaǵy reformalardyń oń áserin kórsetedi deıdi mamandar.
