Ustaz

«Ustazdyq etken jalyqpas, úıretýden balaǵa», dep uly Abaı aıtqandaı, naǵyz ustazdar shyndyǵynda qansha jasqa kelse de, óskeleń urpaqty oqytyp-tárbıeleýden sharshamaıtyny anyq eken. Onyń jarqyn dáleli retinde men úshin ǵylymda parasatty, ómirde ulaǵatty ustaz bolǵan Pedagogıkalyq ǵylymdar akademııasynyń akademıgi, Qazaqstannyń eńbek sińirgen qaıratkeri, pedagogıka ǵylymdarynyń doktory, professor Bolat Ábdikárimulyn tolyq aıtýǵa bolady. Qazaqstannyń ǵylymı-pedagogıkalyq qaýymdastyǵy  B.Ábdikárimulyn elimizdiń toptan ozǵan belgili de bilimdar oqymysty, jańa tolqyn jas ǵalymdar mektebin qalyptastyrǵan bilikti maman retinde jaqsy biledi. Onyń jetekshiligimen pedagogıka salasynan 12 ǵylym doktory, 60 ǵylym kandıdaty, ekonomıka boıynsha 4 ǵylym kandıdaty jáne birneshe magıstrler dárejelerin abyroımen qorǵady. Tekti eldiń tálimi men tárbıesin boıyna sińire otyryp, qasıetti Saryarqanyń keń baıtaq dalasynda bilim men ǵylymdy damytý úshin Bolat aǵa aıanbaı eńbek etip kele jatyr. «Qarııasy bar úıdiń – qazynasy bar», dep dana halqymyz beker aıtpaǵan.  О́mirden kórgeni men túıgeni kóp, kásiptik bilim berý salasynan tájirıbesi mol, ǵylymda ózindik qoltańbasy bar kórnekti ǵalym búginde elordadaǵy S.Seıfýllın atyndaǵy Qazaq agrotehnıkalyq ýnıversıtetinde qyzmet etip, onyń damýyna mol úles qosyp otyr. «Álipti taıaq dep bilmeıtin sábıden sanaly azamatty qalaı tárbıelep shyǵarýdy»  zertteıtin pedagogıkany ǵylymnyń tóresi dep moıyndamaıtyn adam ózin osy kúıinde aspannan aıaǵy salbyrap túse salǵandaı sezinetin shyǵar múmkin. Degenmen, adamdy tárbıeleý eń kúrdeli is ekendigin kimde-kim bolsyn moıyndaıtyny haq. Mine, osyndaı úlken jaýapkershilikti istiń basynda turyp, kúni búginge deıin tyń ıdeıalar usynyp ǵylymı eńbekter jazýdan, boıyndaǵy ulan-ǵaıyr bilimi men is-tájirıbesinen dáris oqyp, shákirt tárbıeleýden Bolat Ábdikárimuly esh jalyqqan emes. Men úshin eńbek jolyn qarapaıym jumysshy bolyp bastap, udaıy oqyp, tynbaı izdenip, ózin ózi jetildirýdiń arqasynda kemel azamat bıigine jetip, búginde el tanyǵan qaıratker dárejesine kóterilgen ustazymnyń orny erekshe. Dúnıe de ózi, mal da ózi, Ǵylymǵa kóńil bólseńiz. Bilgenderdiń sózine, Mahabbatpen erseńiz, dep uly Abaı atamyz aıtqandaı, ulaǵatty ustazymnan kóp nárse úırenip, bilimimdi shyńdaı tústim. Onyń jetekshiligimen kandıdattyq jáne doktorlyq dıssertasııa qorǵap, búginde professor atanyp otyrmyn. Iá, Bolat aǵa qashanda óziniń erekshe bilimdiligimen, asqan parasattylyǵymen meni únemi jigerlendirip alǵa qaraı jetelep otyrady. Bıylǵy, on jeti aqpan kúni Bolat Ábdiká­rimuly ómirdiń taǵy bir  asqarly belesine shyǵyp, 75 jyldyq mereıtoıyn ataǵaly otyr. Osy aıtýly oqıǵaǵa baılanysty barlyq shákirtteri atynan Bolat aǵaǵa mereıjasyńyz merekeli, ómirińiz berekeli, densaýlyǵyńyz zor, otbasyńyz baqytty bolsyn deımiz. Qarlyǵash SARBASOVA, pedagogıka ǵylymdarynyń doktory, professor. ASTANA.