Keshe Ortalyq kommýnıkasııalar qyzmetinde otandyq taýar óndirýshiler baspasóz máslıhatyn ótkizdi. Onda ulttyq valıýta baǵamynyń túzetilýine qatysty aıtyldy.
Brıfıngke «QazAgroInnovasııa» AQ basqarma tóraǵasynyń orynbasary Ázimhan Satybaldın, «Ordabasy Qus» JShS dırektory Murat Taǵaev jáne «Aýyl sharýashylyǵy ónimderin óńdeý QazǴZI dırektory Darıǵash Shaımerdenova qatysty. Olar teńge baǵamynyń ózgerisi týraly aıtyp, onyń otandyq taýar óndirýshilerge tıgizer paıdasy jóninde áńgimeledi. Mysaly, M.Taǵaevtyń sózine qaraǵanda, atalǵan kásiporyn óndirgen taýarynyń 70 paıyzyn ishki naryqqa shyǵarady eken. Al, qalǵan 30 paıyz ónimderi kórshi Reseıge eksporttalatyn kórinedi.
Qazirgi ýaqytta Úkimet kásiporynǵa qoldaý kórsetýmen qatar, ishki naryqta kúrketaýyqqa qajet jem-azyqtyń baǵasyn kótermeýge bel býyp otyr. Budan shyǵatyn qorytyndy, eger jem-azyq baǵasy burynǵy baǵasynda tursa, kásiporynnyń et óniminiń qymbattaýyna eshqandaı negiz joq. Áıtkenmen, kásiporyn budan bylaı eksport kólemin arttyryp, odan túser tabysty barynsha molaıtýdy kózdep otyr eken. Teńge baǵamynyń kezekti teńgerimi osy turǵyda kásiporynnyń jańa jobalardy qolǵa alýyna múmkindik bermek.
Sóz kezegin alǵan Á.Satybaldın oryn alǵan jaǵdaıǵa baılanysty jeke pikirin aıta kelip, «Qazaqstanda azyq-túlik qory jetkilikti, kúndelikti turmysta qoldanylatyn negizgi azyq-túlik túrleri elimizde óndiriledi. Sondaı-aq, astyq eksporttaýshy iri eldiń birimiz. Et eksporty boıynsha da álemdik naryqqa shyǵyp jatyrmyz. Sondyqtan, baǵa sharyqtap ketedi dep alańdaýdyń qajeti shamaly», dedi.
– Teńge baǵamynyń osy túzetilýi otandyq ónim óndirýshilerge álemdik naryqta óz ornyn naqtylap alýǵa kómektesedi dep sanaımyn. Máselen, elimiz jyl saıyn 10 mln. tonnaǵa jýyq astyq eksporttaıdy. Ol altyn ónim qymbatqa baǵalanyp jatsa, baǵam ózgerisi aýyl sharýashylyǵynyń órkendeýine de septigi tıedi emes pe?! Demek, teńge baǵamynyń túzetilýiniń kóleńkeli jaqtaryn ǵana emes, tutas elge keletin paıdasyn da eskergen jón, – dep shegeledi sózin D.Shaımerdenova.Nurbaı ELMURATOV,
«Egemen Qazaqstan».
