Renan Kaleıros suhbattarynyń birinde sáýir aıynda bastalǵan tergeý nátıjesi boıynsha Bolsonarýǵa eldiń baıyrǵy turǵyndaryna qarsy genosıd, laýazymdyq qylmystar, memlekettik qarajatty júıeli paıdalanbaý, sanıtarlyq sharalardy buzý, qylmysqa arandatý jáne jeke qujattardy qoldan jasaý sekildi aıyp taǵylatynyn málimdegen.
О́zi 2020 jyldyń shildesinde koronavırýs juqtyryp, emdelip shyqqanyna qaramastan, ońshyl prezıdent oqshaýlaý, karantın sharalaryna qarsy shyǵyp, dáleldenbegen em túrin alǵa tartqan, sondaı-aq vaksınaǵa kúmán keltirip, COVID-19 indetiniń aýyr saldaryn jeńildetip kórsetýge tyrysqan.
Senattyń tergeý komıssııasy júrgizgen zertteýdiń esebi kelesi seısenbide jarııalanýy kerek. Kelesi kúni komıssııa músheleri qujatty bas prokýratýraǵa jibermes buryn mátinin bir qarap, daýys berýge tıis. Soǵan sáıkes Bolsonarý men ózgelerge aıyp taǵý týraly sheshim qabyldanady.
Bas prokýratýra Prezıdentke aıyp taǵýy múmkin, biraq ony sottaıtyn joǵarǵy sot tómengi palatanyń sot isin jalǵastyrýǵa ruqsatyn suraýy kerek. Sarapshylardyń aıtýynsha, tómengi palata mundaı ótinishpen kelisýi ekitalaı. Al prezıdenttiń keńsesi túsinikteme berý týraly ótinishke birden jaýap bere qoımady.
Jalpy, Bolsonarýdyń halyq arasyndaǵy reıtıngi onyń densaýlyq saqtaý salasyndaǵy basty daǵdarysty sheshý barysyndaǵy áreketterine saı tómendeı bastaǵan. Brazılııada COVID-19-dan 600 myńnan astam adam qaıtys boldy, bul – Amerıka Qurama Shtattarynan keıingi ekinshi kórsetkish.
Kaleırostyń aıtýynsha, baıandamada Bolsonarýdyń keıbir uldaryna jáne burynǵy densaýlyq saqtaý mınıstri Edýardo Posýeloǵa da qylmys jasaǵany úshin aıyp taǵylýy múmkin. Alaıda qylmys jasady degen aıypqa qaı ulynyń iligetini belgisiz.
Osydan birer kún buryn ǵana Brazılııa prezıdenti koronavırýsqa qarsy vaksına saldyrmaıtynyn jarııalaǵan. Al buǵan deıin ol eldegi sońǵy brazılııalyqtan keıin ekpe saldyrýǵa ýáde etken. Alaıda ol sońǵy zertteýlerge súıenip, múldem vaksına saldyrmaıtynyn málimdegen. Brazılııa prezıdentiniń aıtýynsha, onyń ımmýnıteti jetkilikti.
Bolsonarý el azamattarynyń vaksına almaýǵa quqyǵy bar ekenin de aıtqan. Derekterge sensek, prezıdenttiń bul pikiri, kerisinshe halyqtyń vaksınaǵa degen senimi artyp, kópshiligi saldyryp jatqan kezde aıtylǵan. Johns Hopkins ýnıversıtetiniń málimeti boıynsha, Brazılııa halqynyń shamamen 47 paıyzy tolyǵymen vaksına saldyrǵan, al Our World In Data portalyna sensek, turǵyndardyń 72 paıyzy kem degende bir doza ekpe alyp úlgergen.
Bolsonarý osyǵan deıin de óz elinde Covid-19 indetine nemquraıdylyǵy men vırýs taraǵan kezde densaýlyq saqtaý salasyndaǵy saqtyq sharalaryn der kezinde qabyldamaı, uzaq ýaqyt boıy keıinge qaldyrǵany úshin qatty synǵa ushyraǵan.
Sonymen qatar bıyl kyrkúıek aıynda Brazılııa prezıdentiniń BUU-nyń Nıý-Iorktegi shtab-páterine kirer aldynda sheteldik delegasııalarǵa vaksına saldyrý týraly qoıǵan talabyn eskermegeni belgili. Keıinirek Brazılııa delegasııasynyń birneshe múshesiniń indet juqtyrǵany anyqtalǵan.
Bul zertteý sondaı-aq 2022 jylǵy prezıdent saılaýyna aıtarlyqtaı áser eteıin dep tur. Sarapshylar qylmys jasaǵany boıynsha aıyp taǵylmasa da, kelesi jyly oppozısııa ókilderi qazirgi prezıdenttiń qatelikterin jaqsylap betine basýy ábden múmkin dep otyr. Baıandama elde biraz saıası shý shyǵaryp, jaǵymsyz jańalyqty kóbeıtýi múmkin. Tek elde ǵana emes, halyqaralyq qoǵamdastyq ta bul oqıǵadan habardar bolary anyq. Al bul óz kezeginde onsyz da bedeli az Bolsonarýǵa degen qurmetti arttyrmaıtyny túsinikti. Qoǵamda Bolsonarýdyń qolynda bılik bar kezde zań aldynda jaýap beretinine senim az. Degenmen, saılaý naýqanynyń aldynda ábigerge salatyny sózsiz.
