«Sýretshiler úıiniń» ashylý saltanatyna aýdan ákimi Tólegen Telǵaraev, aýdannyń qurmetti azamaty, mádenıet janashyry Kúlııa Aıdarbekova, Sýretshiler odaǵynyń tóraǵasy О́mirbek Jubanııazov qatysyp, jınalǵan qaýymǵa júrekjardy tilekterin jetkizdi. Sondaı-aq mádenıet úıinde elimizdiń óńirlerinen jáne shetelderden kelgen óner ıelerine Quttybek Tynybekulynyń týyndylary tanystyrylyp, óner ıesiniń «Tólebı – Uly dala mekenim» atty shyǵarmashylyq keshi ótti. «Ultymyzdyń tarıhyn, salt-dástúr, ádet-ǵuryp, turmys tirshiligin beıneli ári kórkem túsindiretin halyqaralyq deńgeıde uıymdastyrylyp jatqan «Tólebı – Uly dala mekenim» atty sýretshiler plenerine kórshiles О́zbekstan, Qyrǵyzstan memleketi men Nur-Sultan, Almaty qalalarynan halyqaralyq dárejedegi sýret sheberleri kelip otyr. Plenermen birge jas sýretshilerdiń shyǵarmashylyǵyna serpin beretin oblystyq «Bir ólke – bir sýret!» atty jas sýretshiler sımpozıýmynyń ótýi de kóp jaıtty ańǵartady», deıdi aýdan basshysy Tólegen Turtaıuly.
