«Dınamodan» utylyp qaldy
Qurlyqtyq hokkeı lıgasynda (QHL) óner kórsetetin Nur-Sultannyń «Barysy» tórt oıynǵa sozylǵan syrt aıdyndaǵy matchtar serııasyn aıaqtap, elordaǵa oraldy. Mınskide ótken sońǵy oıynda qazaqstandyq komanda jergilikti «Dınamoǵa» ese jiberdi.
«Mınsk-Arenaǵa» jınalǵan 5 myń jankúıer tartysty ótken básekede 11 shaıbanyń kýási boldy. Kezdesýdiń birinshi jáne jetinshi mınýttarynda «Barystyń shvesııalyq shabýylshysy Iаkob Lılıa mergendigimen kózge túsip, elordalyq klýbty esepte alǵa shyǵardy. Biraq «Barys» oıynshylarynyń qýanyshy uzaqqa sozylmady. Ekinshi kezeńde shıelenisti oıyn óz jalǵasyn tapty. 28-mınýtta «Barys» Darren Dıstiń golynyń arqasynda esepte qaıta alǵa shyqsa, 36-mınýtta Mattıas Tedenbıý tablodaǵy kórsetkishti 3:3-ke jetkizdi.
Úshinshi kezeńde qarqynyn báseńdetip alǵan jerlesterimiz tablodaǵy basymdyqty ustap qala almady. Aıdyn ıeleri aınaldyrǵan 7 mınýttyń ishinde Ionı Ortıo qorǵaǵan qaqpaǵa úsh shaıba soǵyp, 6:4 nátıjesimen alǵa shyqty. 52-mınýtta Iаkob Lılıa oıyndaǵy úshinshi, «Barystyń» besinshi golyn soqqanymen, komandasyn jeńilisten qutqaryp qala almady. Esep – 6:5.
20 oıynnan keıin «Barys» «Shyǵys» konferensııasynda 7-orynda tur. Qorjynynda 18 upaıy bar. Jerlesterimiz kelesi eki oıynyn elordada ótkizedi. Erteń «Barys Arenada» Iаroslavldiń «Lokomotıvin» qabyldasa, 24 qazanda Cherepovestiń «Severstalimen» kezdesedi.
Maýsymdy jeńispen qorytyndylady
Qazaqstandyq Astana – Premier Tech velokomandasy Venesııada ótken osy maýsymdaǵy sońǵy velojarysqa qatysyp, jyldy jeńispen túıindedi. Bir kúndik «Veneto Klassık» básekesinde «Astana» ókili Samýele Battıstella top jardy.
Astana – Premier Tech komandasy úshin maýsymnyń sońǵy jarysy Venesııadan bastalyp, Bassano-del-Grappa aımaǵynda óz máresine jetti. 206 shaqyrymdyq qashyqtyqty «Astananyń» ıtalııalyq veloshabandozy Samýele Battıstella 5 saǵat 1 mınýt 49 sekýndta júrip ótip, óziniń kásibı deńgeıdegi alǵashqy jeńisine qol jetkizdi.
Ekinshi jáne úshinshi oryndardy ıelengen shveısarııalyq Mark Hırshı (UAE Team Emirates) men kolýmbııalyq Djonatan Restrepo (Androni Giocattoli – Sidermec) Battıstelladan 6 sekýndqa qalyp qoıdy. Al bir aptanyń ishinde eki jarysta top jarǵan qazaqstandyq Alekseı Lýsenko bul básekeni tórtinshi orynmen aıaqtady.
Tennısshiler tegis súrindi
Reseı astanasy – Máskeýde ATP 250/WTA 500 sanatyndaǵy erler men áıelder arasynda dástúrli «Kreml kýbogy» týrnıri ótip jatyr.
О́kinishke qaraı, halyqaralyq jarysta Qazaqstan atynan qatysqan barlyq tennısshimiz birinshi aınalymda súrindi. Erler arasynda óner kórsetken Aleksandr Býblık alǵashqy kezeńde álemdik reıtıngte 164-orynda turǵan ýkraınalyq Ilıa Marchenkodan 4:6, 3:6 esebimen jeńilip qaldy.
Sonymen qatar qyzdar básekesinde baq synaǵan álemniń 17-raketkasy Elena Rybakına chehııalyq Market Vondroýshovaǵa (35) 4:6, 4:6 nátıjesimen jol berdi. Taǵy bir qazaqstandyq tennısshi Anna Danılına da ekinshi aınalymǵa shyǵa almady. Juptyq jarysta aýstralııalyq Arına Rodıonovamen birge kortqa shyqqan ol chehııalyq Marııa Boýzkova men Lýsıı Gradeskaıadan utyldy – 1:6, 1:6.
Daıyndaǵan
Álı BITО́RE
