Al endi osylardyń ishi-syrtyn jóndep, iske jaratsa, qazirgi tańda ótkir turǵan baspana máselesin tıimdi sheshýdiń bir joly bolady da shyǵady. Máselen, Buqar jyraý aýdanyndaǵy Doskeı aýylynda dál osyndaı toǵyz kópqabatty úı kúrdeli jóndeýden ótip, qalpyna keltirilgen. Bul degenińiz – 508 páter. Eki jyl boıy júrgizilgen jumys qazir jemisin bere bastaǵan.
Eski de jańa páterge ıe bolǵan Marııa Sarıdı esimdi jergilikti turǵyn jalǵyzbasty ana retinde baspana kezeginde jeti jylǵa jýyq turypty.
– Baspanaly bolýdan úmit úzgen kezde qolyma páter kilti tıdi. Ulym ekeýmizdiń baqyttan basymyz aınaldy. Úı jyly, tipti kireberiste de batareıalar ystyq bolyp turady. Barlyq kommýnaldyq ıgilikter bar. Maǵan eki bólmeli páter satyp alý quqyǵymen jalǵa berildi. Bes jyl ishinde onyń ıesi bola alamyn. Aıyna 3 myń teńgege jýyq jaldaý aqysyn tóleımin, – deıdi ol baqyttan júzi bal-bul janyp.
Jalpy, Buqar jyraý aýdanynda baspana kezeginde turǵandardyń sany 1 100 adam eken. Munyń 139-y Doskeı aýyldyq okrýginiń turǵyndary. Al bul aýylda kelesi jyly 40 jáne 60 páterlik eki kópqabatty úı paıdalanýǵa beriledi dep josparlanǵan.
Aıta ketetin bir jaıt, qalpyna keltirilgen kópqabatty úılerge barlyq ınjenerlik ıgilik, sonyń ishinde ortalyqtandyrylǵan jylý jelileri tartylǵan. «Jumyspen qamtýdyń jol kartasy» baǵdarlamasy aıasynda modýldik qazandyq ornatylǵan. Eki qazandyqtyń qýaty bes úıdi jylytýǵa jetkilikti. Barlyq kópqabatty úıler qalpyna keltirilgende, taǵy bir qazandyq iske qosylmaq.
Buqar jyraý aýdanynyń ákimi Serjan Aımaqov kelesi jyly paıdalanýǵa beriletin úılerdiń de aýlalary abattandyrylyp, jolyna asfalt tóseletinin aıtady. «Ásirese biz balalardyń salamatty ómir saltyn serik etip, sportpen aınalysýyna barlyq jaǵdaı jasaımyz. Aýlalarda oıyn jáne sport alańdary ornalasyp, fýtbol korty qoıylady», deıdi
aýdan ákimi.
