Armatýra shyǵaratyn «Evraz Kaspıan Stal» zaýytynyń dırektory Vladıslav Senzýranyń aıtýynsha, ózi basqaryp otyrǵan kásiporyn men ózge de birneshe iri kompanııaǵa osy temir joldyń tóńireginde shıelenisken jaǵdaı ekonomıkalyq shyǵyn keltirýi múmkin.
2018 jyly «Tobyl trans» seriktestigi Qostanaı temir jol stansasynda qaraýsyz jatqan temirjol torabyn konkýrs boıynsha utyp alyp, ony 30 jylǵa senimdi basqarý quqyna ıe bolǵan. Uzyndyǵy 2 shaqyrym bolatyn temirjol sodan keıin jóndeýden ótip, paıdalanýǵa berildi. Qostanaı arqyly ótetin toqsan taraý torapty jalǵap jatqan temirjol oblys ortalyǵyndaǵy «Agromashholdıng» JShS, «Istkomtrans» JShS, «AgromashholdıngKZ» JShS, «MashTeh» AQ, «KSTtrade» JShS, «Qostanaı úı qurylysy kombınaty» JShS sııaqty iri kásiporyndardy júk vagondarymen qamtamasyz etip turdy. «Tobyl trans» basshylarynyń sózine sensek, seriktestik sońǵy 9 aıdyń ishinde Qostanaı qalasyna kirip-shyǵyp jatqan júk aınalymynyń 40%-dan astamyn vagonmen qamtamasyz etken.
«Tobyl trans» atqaryp jatqan jumystyń sapasy temirjolshylardyń da, oblys ortalyǵyndaǵy iri kásiporyn basshylarynyń da kóńilinen shyǵatyn sııaqty edi, alaıda osydan birneshe aı buryn Qostanaı qalalyq ákimdiginiń memlekettik aktıvter jáne satyp alý bólimi sotqa júginý arqyly joǵaryda atalǵan seriktestikti senimdi basqarý quqyǵynan aıyryp, 30 jylǵa jasalǵan kelisimshartty merziminen buryn buzýdy talap etti. Birinshi satydaǵy sot máseleni «Tobyl transtyń» paıdasyna sheship bergen. Biraq bul sottyń sheshimine qalalyq ákimdik narazylyq bildirip, shaǵym túsirip, apellıasııalyq satyda jeńip shyqty.
Osylaısha, jańa konkýrs jarııalanyp, toraptyń jańa ıesi tabylǵansha, búkil transporttyq júktemeni birneshe menshik ıesi bar negizgi temirjol atqaratyn bolyp sheshilgen. Osy tusta júk tasý qyzmetiniń tarıfi men negizgi temirjoldyń júk jóneltý qabiletine qatysty eki birdeı másele boı kóterip shyǵa keldi. Máseleniń mánisi mynada: jańa júkteme qosylsa, M8 dep atalatyn negizgi temir joldyń júktemesi burynǵysynan birneshe ese artyp ketedi. Osynyń saldarynan vagondar qalaǵa kiretin jáne shyǵatyn joldarda uzaq ýaqyt kezek kútip, qańtarylyp turyp qalýy múmkin. Kásipkerlerdiń sózinshe, munyń arty ózderi basqaryp otyrǵan iri kásiporyndardyń jumysyna kedergi keltirip, basy artyq shyǵynǵa ushyratady.
«QTJ Júk tasymaly» JShS fılıalyna qarasty kireberis joldar bóliminiń jetekshi ınjeneri Ásel Qaıralapovanyń aıtýynsha, tyǵyryqqa tirelgen jaǵdaıdan shyǵýdyń jalǵyz joly – jańa konkýrs jarııalanyp, temirjoldyń jańa ıesi anyqtalǵansha, ony paıdalaný týraly ýaqytsha nusqaýlyq ázirleý qajet. Mamandar aralyq ýaqyt jarty jylǵa deıin sozylady deıdi. Oǵan deıin «Tobyl trans» óz qyzmetin jalǵastyra beredi. Munymen oblystyq transporttyq baqylaý ınspeksııasy da kelisip otyr. О́ńirlik kásipkerler palatasynyń dırektory Danııar Smaǵulovtyń sózinshe, bul máseleniń rettelýin prokýratýra da óz baqylaýyna alýǵa tıis.
