Eki ekpeniń arasy – 11 aı
Pfizer, BioNTech zertteýleri vaksınanyń úshinshi komponenti tıimdi ekenin kórsetken.
Pfizer Inc jáne nemis seriktesi BioNTech kompanııalary beısenbide III synaq kezeńiniń zertteý nátıjeleri COVID-19 vaksınasynyń úshinshi dozasynyń vırýsqa qarsy, «Delta» nusqasyn qosa alǵanda, joǵary tıimdiligin kórsetkenin habarlady.
Olardyń aıtýynsha, 16 jastan asqan 10 myń adam qatystyrylǵan zertteý «Delta» shtamy basym bolǵan kezeńde indetke qarsy úshinshi komponenttiń 95,6% tıimdiligin kórsetti.
Zertteýde sondaı-aq úshinshi qosymsha komponenttiń qaýipsiz ekeni anyqtalǵan.
Pfizer vaksınasy eki bóliginiń tıimdiligi ýaqyt óte kele tómendeıtinin málimdedi. Muny ekpeniń ekinshi dozasynan keıin tórt aı ótken soń 96% qorǵanys bergen vaksınanyń kúshi 84%-ǵa tómendeıtinin dáleldegen zertteýge súıene otyryp aıtqan. Keıbir elder qazirdiń ózinde vaksınanyń úshinshi dozasyn salý josparlaryn júzege asyra bastady.
Dári óndirýshiler ekinshi doza men údetkish úshinshi ekpe nemese plasebo arasyndaǵy ortasha ýaqyt shamamen 11 aıdy quraıtynyn atady. Úshinshi bólikti alǵan topta indet juqtyrǵan 5 adam anyqtalsa, plasebo, ıaǵnı quramynda vaksına joq ekpeni alǵan topta 109 jaǵdaı tirkelgen.
Qatysýshylardyń ortasha jasy 53-ti qurady, al olardyń 55,5 paıyzy 16-dan 55 jasqa deıin jáne 23,3 paıyzy 65 jáne odan joǵary jasta bolǵan.
Samsung smartfondaryn satýǵa tyıym salyndy
Máskeý tórelik soty Samsung Electronics kompanııasynyń reseılik enshilesine Samsung Raý tólem qyzmetin paıdalaný týraly patenttik daýǵa baılanysty Reseıde Samsung smartfondarynyń 61 modelin satýǵa tyıym saldy. Bul birinshi satydaǵy sottyń qosymsha sheshiminiń qorytyndysyna saı oryndalýǵa tıis.
Sheshimge sáıkes, el aýmaǵynda Samsung Galaxy Z Flip, Samsung Galaxy Fold, Samsung Galaxy Z Fold 2 sekildi basqa da birqatar smartfon modelderin sata almaıdy.
Sheshim qabyldanǵan kúnnen bastap bir aı ishinde qaıta shaǵym túsirýge múmkindik bar ekeni aıtylady.
Shildede Máskeýdiń tórelik soty Shveısarııanyń «Kvın SA» kompanııasynyń «Samsýng Elektronıks Rýs Kompanı» kompanııasyna patent quqyqtaryn qorǵaý týraly talap-aryzyn qanaǵattandyryp, Samsung Pay tólem servısiniń jumysyna tyıym salǵan.
