– Tań syz bere, úıdiń qarsy betindegi toǵaıǵa qarasam, qaıyńnyń bas jaǵynan áldebir noqat qaraýytady. Qus deıin desem, iri. Jaqyndap baryp qaradym, kádimgi aıýdyń qonjyǵy. Tegi ıtten qashty ma, qaıyńnyń bas jaǵyna shyǵyp alypty, – deıdi aýyl turǵyny Seıdahmet Áshimhanov.
Ulttyq park qyzmetkerleriniń aıtýynsha, aıý aýyldyń aıaq jaǵynda ósetin jabaıy almaǵa keletin kórinedi. Onyń ústine mıgrasııa ýaqyty. Sońǵy sanaq boıynsha, Katonqaraǵaı tabıǵı ulttyq parkiniń aýmaǵyndaǵy aıýlardyń sany 330-ǵa jetken. Eldi mekenderge erkin kelgishtep júrgenderimen malǵa, adamǵa zııany joq.
– Kóktem men kúzde sanaq júrgizip otyramyz. Jalpy, ań sany kóbeıip keledi. Atýǵa múldem bolmaıdy. Zań bar, soǵan qaraı tártip bar. Aýyl taýdyń eteginde turǵandyqtan ańdardyń aýylǵa túsýi qalypty jaǵdaı. Eń bastysy, adamzatqa zııany tımese boldy, – deıdi Katonqaraǵaı MUTP janýarlardy qorǵaý jáne óńdirý bóliminiń bastyǵy Erik Qasymov.
Ánebir jyldary Katon aýylynyń ortalyq kóshesinde múıizi shańyraqtaı bulan da kózge túsken. Al aıýdyń aýylǵa kirýi birinshi ret emes. Alaıda qaıyńnyń bıigine shyǵyp alyp, túse almaı turǵanyn kópshilik qyzyqtap, sýretke túsirip alypty. Aıtpaqshy, jerge túsken qonjyqty qoryqshylar úrkitip taý jaqqa qaraı qýyp jibergen.
