Senim art maǵan, týǵan el!

«Jas kelse – iske» deıdi hal­qymyz. Jastar – qashanda tyń ıdeıa­lardyń qaınar kózi, oń ózge­risterdiń qozǵaýshy kúshi. Son­dyqtan óskeleń urpaqtyń osyndaı áleýetin durys arnaǵa baǵyttap, tıimdi paıdalanýy­myz kerek» dep el Prezıdenti Qasym-Jomart Toqaev bir sózinde atap kórsetken bolatyn. Búgingi jastar barynsha bilimdi bolyp, ór­kenıetti elderdiń órisin ańdap, jasampaz jańalyqtardy jas janyna sińirip, alǵa umtylýlary kerek.

Forýmǵa el ishindegi ıgi­likti isterge uıytqy bolyp júr­gen jastar qozǵalysynyń je­tek­shileri, el shetine jaman tu­maýdyń jan titirenter surapyl habary jetkende bastaryn báı­gege tigip, nebir tolymdy sharýa­lardy atqarǵan eriktiler uıym­darynyń ókilderi, aldarynan jumys úrkip otyratyn, tepken tasy órge domalap turǵan jas kásipkerler men táýelsizdik­tiń qurdastary qatysty.

Aldymen sóz alǵan oblystyq ishki saıasat basqarmasy basshy­synyń orynbasary Narıman Ábdirahmanov el úmit artyp otyrǵan jastardyń táýelsizdik jyldary atqarǵan tolymdy isin tarqatyp aıtyp berdi. Aldaǵy asqaraly mindet júgi saralandy.

– Búgingi tańda jastardyń máseleleri de az emes. Aıta­lyq, joǵary oqý ornynyń stý­dentteri bilim berýdiń dástúrli for­matyna kóshken kezde bir­qatar óńirde jataqhana je­tis­peı, qıyndyq kórýde, – dedi «Qazaqstan stýdentteriniń Alıan­sy» respýblıkalyq stýdentter qozǵalysy» qoǵam­dyq birlestiginiń prezıdenti Ilııas Tústikbaev. – Jataqhana bólmelerine áleýmettik qa­shyq­tyqty saqtap ornalasý tár­tibi­ne baılanysty orynnyń azaıyp qalýy sebepti zárýlik týyn­dap otyr. Osy oraıda biz oqý oryndarynyń basshyla­ryna qaladaǵy qonaqúı ıele­rimen jáne páterlerin jalǵa berýshilermen kelisim jasasyp, ornalastyrý jaǵyn qaras­tyrýdamyz. Kókshetaýdan asa kóp aryz-shaǵym túsip jatqan joq. Jalpy, stýdentter belsendi bolýlary kerek. Olar bilim berý salasynyń tynys-tirshiligine ózderi aralasyp, qozǵaýshy kúsh bolyp, stıpendııa taǵaıyndaý men oqý granttaryn bólýge qa­tysyp otyrsa, barlyq másele ádil sheshiletindigine kúmán joq.

Jastardyń boıyndaǵy ja­lyn jigerdiń, qıyn kezeńde el ıyǵyna túsken salmaqty bir­lese kóterip, jalpaq jurttyń birligin nyǵaıtyp, ıgilikti ister­ge uıytqy bolyp, aıanbaı atsalysatynyn kóz kórip júr. Pan­demııa bastalǵaly oblys jastary jalǵyzbasty, egde adamdardy, kópbalaly otbasylaryn qamqorlyqtaryna alyp, keleli sharýalar atqardy. Emhanaǵa bekitilgen sozylmaly syrqaty bar adamdarǵa dári-dármekterin jetkizip berdi. Qarǵa adym jer muń bolyp, qol qysqarǵanda azyq-túlik sebetterin daıyndap, jan jylýyn tókti. Kúndelikti turmysqa qajetti zattarmen birge jyly kıimder jınasty. Qaqaǵan qysta soltústiktiń si­res­ken qarynan aýlalardy ta­zartyp, otyn-kómirlerin úıip berýge qolushyn berdi. Osy­laısha, janashyrlyǵy mol jas­tar qam kóńildi qarııalar­dyń qıyndyqtyń qursaýynda jal­ǵyz qalyp qoımaıtynyn ańǵar­typ, et júrekterin eljiretti.

Kásipker jastar óz aldyna tyrbanyp, boılaryndaǵy bi­lim men bilikti, qajyr men qaı­ratty jumyldyryp, el ıgi­ligin molaıtýǵa atsalysýda. Olar ózderiniń qaraqan bas­ta­rynyń qamy úshin emes, zaman­dastarynyń da áleýmettik-turmystyq jaǵdaılaryn jaq­sartýǵa mol úles qosýda. Aı­talyq, bir kásipker óz isin bastasa, sonyń mańaıynda toptasqan ózgeler jumysqa ornalasady, ıaǵnı jańa jumys oryndary ashylady.

– Biz ózimizdiń qolymyzdan is keletinin kórsetýimiz kerek, – deıdi táýelsizdik qurdasy, jat­tyqtyrýshy Mırzada Seıitqa­lı. – Ol úshin bizdiń zamandastarymyz salamatty ómir saltyn berik ustap, sportty serik etkenderi lázim. Tepse temir úzetin deni saý urpaq jalqynyń ǵana jetistigi emes, qoǵamnyń baılyǵy.

Forýmǵa qatysýshylar su­raq-jaýap túrindegi suhbat alańyn­da ózderin tolǵandy­ryp júr­gen keleli máselelerdi keńinen talqylap, oı talqysyn órbitti. Oblys ortalyǵyndaǵy Shoqan Ýálıhanov atyndaǵy, Abaı Myr­­zahmetov atyndaǵy ýnıversı­tettermen stýdent­ter máselesi ekshelgen memorandým­ǵa qol qoıyldy.

Jastardyń máselesin kók­segen jıyn Jas sarbaz lagerin­de jalǵasty. Tamyljyǵan tabı­ǵat aıasynda jas kókirekter­den ushqyndaǵan alaý oty jalpaq eldiń jas býynyn qamtyp, arman otyn jandyryp turǵandaı ádemi áser qaldy.

KО́KShETAÝ