Bul ıgi shara «Elbasy akademııasy» KQ uıymdastyrýymen qolǵa alynyp otyr. Atalǵan jobaǵa Tuńǵysh Prezıdenttiń «El Úmiti» bastamasy aıasynda júzege asyp jatqan jobalardyń úzdik, belsendi qatysýshylary arasynda júrgizilgen irikteýden ótken jalyndy 10 jas qatysýda. Olar is-shara aıasynda óńirlerdegi «El Úmiti» bastamasynyń 45 shaqty joba qatysýshysymen bas qosatyn bolady.
Ekspedısııa kemel oıly Elbasynyń kindik qany tamǵan Almaty oblysy, Qaskeleń aýdany, Shamalǵan aýylynan bastaý alady. Qatysýshylar bala kúninde ushqysh bolýdy armandaǵan Elbasynyń suńǵyla saıasatkerge aınalǵanynan habardar bolyp, balalyq shaǵy ótken mekendi aralaıdy. Ekspedısııa músheleri Úshqońyr taýynyń etegindegi Nursultan Nazarbaevtyń «Atameken» tarıhı-mádenı ortalyǵyna barady. Onda Elbasynyń ómiri týraly ǵana emes, táýelsiz Qazaqstannyń tarıhy men Nur-Sultan qalasy týraly baı materıaldar qamtylǵan. Elbasynyń mektep qabyrǵasyndaǵy sátteri men qyzmeti jóninde qundy málimetter bar.
Joba qatysýshylary Qaskeleń qalasyndaǵy 63 jyl buryn Elbasy qanat qaqqan Abaı atyndaǵy orta mektep-gımnazııasyna baryp, «El Úmiti» bastamasy aıasynda júzege asyrylyp jatqan Birge Oqý onlaın mektebiniń oqýshylarymen kezdesedi. Birge Oqý onlaın mektebinde «Myń bala» Ulttyq zııatkerlik olımpıadasynyń fınalısteri men jeńimpazdary oqyp jatyr (joba «El Úmiti» bastamasy aıasynda júzege asyrylady). Onlaın mektepte balalar sapaly sıfrly bilim berý resýrstaryna kirip, Nazarbaev zııatkerlik mektepteriniń, Respýblıkalyq fızıka-matematıka mektebiniń jáne elordalyq lıseılerdiń 104 joǵary bilikti ustazy, 33 tálimger, 10 ádiskerden bilim alýda. «Myń bala» jáne Birge Oqý jobalary aýyl men qala mektepteri arasyndaǵy bilim berý aıyrmashylyǵyn azaıtýǵa yqpal etedi. Qazir onlaın mektepte respýblıkanyń 14 oblysynan 3 myńnan astam oqýshy, onyń ishinde Almaty oblysynan 304 oqýshy tegin qosymsha bilim alyp jatyr. Aýyl mektebinde oqyǵan balalardy qoldap, ári qaraı damytý úshin «Myń bala» olımpıadasy ekinshi jyl qatarynan ótkizildi.
Bıyl Almaty oblysy boıynsha olımpıadaǵa 5-6-synypta oqıtyn 29 342 oqýshy qatysty. Júldeli oryndarǵa 200 oqýshy ıe boldy. Daryndy balalarǵa arnalǵan mamandandyrylǵan mektepterge 6-synyp oqýshylarynan 44 jeńimpaz qabyldandy. Atap aıtar bolsaq, Almaty qalasyndaǵy Respýblıkalyq fızıka-matematıka mektebi, «Bilim-Innovasııa» lıseıi, «Daryn» mamandandyrylǵan mektepteri. Joba qatysýshylary ári qaraı Almaty qalasyna baryp, Respýblıkalyq fızıka-matematıka mektebiniń mán-jaıymen tanysady. Bul mektepte «Myń bala» olımpıadasynyń 35 jeńimpazy bilimin jetildirip jatyr. Kelesi kezekte Nursultan Nazarbaev qorynda halyqaralyq olımpıadada top jarǵan «El maqtanyshy» syılyǵynyń ıegerleri bas qosyp, ǵylymǵa engizgen jańalyqtar men túrli ıdeıalar tóńireginde pikir almasady. Ári qaraı ekspedısııa qatysýshylary Túrkistan men Shymkent qalalaryna bet alady.
