Eki ujym úshin de bul jolǵy oıynnyń mańyzdylyǵy óte erekshe edi. Sebebi «Qaırat» óz alańyndaǵy oıynda «Astanadan» jeńilip, elordalyq klýbqa úsh upaıdy op-ońaı ustata salatyn bolsa, onda chempıonattaǵy basty qarsylasyna chempıondyq tájdi de óz qolymen tapsyratyn edi. Almatylyq ujym úshin «Ortalyq» stadıonda, onyń ústine óz jankúıerleriniń qoldaýymen ótken oıynda «Astanadan» jeńilýge bolmaıdy. Sondyqtan bul oıynda almatylyq klýbty tek jeńis qana qanaǵattandyratyn.
Al «Astana» oıynshylary jeńiske jetetin bolsa, syrt alańda basty qarsylastarynan basym túsip, bir jyl buryn pandemııaǵa baılanysty Almatyda ótken birinshilikte jibergen esesi men chempıondyq ataǵyn da qaıtaryp alýǵa taǵy bir mańyzdy qadam jasaıtyn edi. О́ıtkeni týrnır kestesinde «Astanany» ókshelep kele jatqan «Tobyl» elordalyqtardan bir upaı qalyp kele jatqan-dy. Sol úshin bul oıynda «Astanaǵa» úsh upaı aýadaı qajet bolatyn.
Kezdesýdiń alǵashqy mınýttarynda «Astana» fýtbolshylary belsendirek bolyp, «Qaırat» qaqpasynyń aldynda birqatar qaýipti shabýyl uıymdastyryp úlgerdi. Biraq qarymta shabýylǵa ıek artqan alań qojaıyndary 8-mınýtta gol soǵyp, esepte alǵa shyqty. Goldyń avtory – Neboısha Kosovıch. Iаn Vorogovskııdiń asyrǵan pasy alǵashynda «Astana» oıynshysyna tıip, keri qaıtty. Keıinnen dopqa «Qaırattyń» chernogorııalyq fýtbolshysy birinshi jetip, «Astana» qaqpashysyn qapy qaldyrdy. Bul esep match sońyna deıin ózgerissiz qaldy.
Birinshi taımnyń sońyna qaraı matchta qyzyq oqıǵa oryn aldy. «Astananyń» bas bapkeri Andreı Tıhonovqa kezdesýdiń bas tóreshisi Igor Chesnokovtyń alańdaǵy is-áreketi unamasa kerek, shákirtterin birinshi kezeńniń aıaqtalýyna eki mınýt qalǵanda kıinip-sheshiný bólmesine alyp ketti. Biraq arada birneshe mınýt ótkende fýtbolshylar qaıta alańǵa shyǵyp, oıyndy jalǵastyrdy. Matchtan keıin Tıhonov oıyn sátinde alańnan shyǵyp ketý óziniń emes, fýtbolshylardyń ortaq sheshimi ekenin aıtty.
Jalpy, bul – Qazaqstan fýtbol tarıhyndaǵy birinshi jaǵdaı emes. Buǵan deıin «Qaısar» jáne «Qaırat» fýtbolshylary da osyndaı jaǵdaıdy bastan ótkerip, alańdy tastap ketken bolatyn. Bir qyzyǵy, olar sol ketkennen jasyl alańǵa qaıta oralmaǵan edi.
Osylaısha «Qaırat» mańyzdy oıynda qarsylasynan 1:0 esebimen basym tústi. Al qatar ótken «Tobyl» men «Shahter» arasyndaǵy kezdesýde qostanaılyq ujym jeńiske jetip, týrnır kestesinde birinshi orynǵa kóterildi. Qostanaıǵa ekinshi qurammen kelgen «Shahter» alań ıelerinen iri eseppen jeńildi. Matchtyń 16-mınýtynda Aleksandr Marochkın gol soqsa, keıin Igor Sergeev esepti eseledi. Al ekinshi taımda Azat Nurǵalıev pen Elgýdja Lobjanıdze bir-bir gol salyp, matchtyń núktesin qoıdy. Qonaqtar sapynan jubanysh golyn Andreı Gıorgıadı soqty. Osylaısha bul match 4:1 esebimen «Tobyldyń» paıdasyna sheshildi.
«Shahter» bul oıynda jeńse de, jeńilse de eshteńe joǵaltpaıtyn bolǵan soń, bar kúshin alda bolatyn el kýbogyndaǵy matchqa saqtap, Qostanaıǵa jas fýtbolshylaryn jiberdi. Al negizgi quramnyń fýtbolshylary kýbok básekesinde «Tarazben» ótetin matchqa daıyndalyp jatyr.
25-týrdyń qalǵan oıyndarynyń nátıjesi mynadaı: «Ordabasy» – «Taraz» – 2:1, «Turan» – «Aqtóbe» – 1:2, «Qaısar» – «Jetisý» – 0:1, «Kaspıı» – «Aqjaıyq» – 2:2, «Atyraý» – «Qyzyljar» – 0:0:
Bıylǵy birinshilikte kim chempıon bolatynyn sońǵy týr oıyndary anyqtap beredi. Buǵan deıingi chempıonattarda jeńimpaz komanda 3-4 týr buryn anyqtalyp qoıatyn bolsa, bıyl birinshi ret chempıon komanda sońǵy týrda anyqtalmaq.
30 qazanda ótetin 26-týr oıyndarynda myna komandalar kezdesedi: «Taraz» – «Qaısar», «Jetisý» – «Qaırat», «Astana» – «Turan», «Aqtóbe» – «Kaspıı», «Aqjaıyq» – «Tobyl», «Shahter» – «Atyraý» jáne «Qyzyljar» – «Ordabasy».
