Qolónerdi kásip etken sheberler Otyrar óńirinde de az bolmaǵan. Olar Tegis usta, Aryn Tegisuly, Syzdyq usta, Nadaıymbek Syzdyquly, Qaldaıaq usta, t.b. Búginde bul sheberlerdiń qolynan shyqqan buıymdar kóne jádiger bolyp mýzeıde saqtalsa, esimderi tarıh betterinde jazýly.
Jýyrda jergilikti qolónershiler men sýretshilerdiń qolynan shyqqan týyndylaryn kópshilik nazaryna usynyp, óńirge keletin týrısterdiń halyq qolónerine degen qyzyǵýshylyǵy men suranysyn týdyrý maqsatynda «Otyrar» memlekettik arheologııalyq mýzeı-qoryǵynyń uıymdastyrýmen qolóner sheberleri men sýretshiler jármeńkesi ótti.
Jetinshi márte uıymdastyrylǵan dástúrli jármeńkeni Otyrar aýdany ákimi Ábdiǵanı Júnisov pen Otyrar memlekettik arheologııalyq qoryq-mýzeıi dırektory Jangeldi Mahashov ashyp berip, altyn qoldy sheberlerge sáttilik tiledi.
Jármeńkede aǵashtan, temirden túıin túıgen, júnnen kóz jaýyn alatyndaı buıym jasaǵan, asyl tastardan sán buıymdaryn soqqan, súıek pen múıizdi, shıdi qıynnan qıystyrǵan halyq sheberleriniń maqtaýǵa turatyn óner týyndylary kópshilikke usynylyp, eńbekteri baǵalandy.
Etnograf, qolóner sheberi, Qazaqstan dızaınerler jáne Sýretshiler odaǵynyń múshesi Kendebaı Qarabdalov qolóner sheberleri men sýretshilerge ádilqazylardyń sheshimimen uıymdastyrýshylardyń arnaıy marapattary men syılyqtaryn tapsyrdy. «Eń úzdik sýretshi» nomınasııasy Rınat Tabylhan, «Eń jas sýretshi» nomınasııasy Bashar Samat ıelense, «Eń úzdik sheber» nomınasııasy Amangeldi Baqytqa, «Eń jas sheber» nomınasııasy Rysbaı Elvıraǵa berildi.
Úzdik týyndylarymen úsh oryn taǵaıyndalyp, sheberler marapattaldy. Úshinshi oryndy Jumabek Erdińqul, ekinshi oryndy Janna О́te, birinshi oryndy Anarbaı Qaldarbekov ıelendi.
Úrzııa JUMABAIQYZY
