Fınaldyq matchta el chempıony – О́skemenniń «Altaıy» men kúmis júldeger – Taldyqorǵannyń «Jetisý» komandasy bas júldeni sarapqa saldy. Sońǵy kezde chempıondyq ataq úshin ózara talasyp júrgen qos komanda quramynda jańa maýsym aldynda birqatar ózgerister boldy.
«Altaıdy» burynǵysha serbııalyq maman Marko Grshıch jattyqtyrsa, «Jetisý» tizginin belgili qazaqstandyq voleıbolshy Elena Pavlova aldy. Alǵashqy eki partııada Qazaqstan ulttyq quramasynyń kapıtany, Oral voleıbolynyń túlegi Sana Anarqulova bastaǵan óskemendikter 25:22, 25:16 esebimen basym tústi. Alaıda budan keıin taldyqorǵandyqtar qatarynan eki partııany alyp, tarazy basyn teńestirdi.
Ásirese, olardyń qatarynda reseılik Valerııa Shatýnova sııaqty voleıbolshylar nátıjeli oıynymen kózge tústi. Degenmen sońǵy sette «Altaı» 15:11 esebimen jeńisti julyp alyp, besinshi ret el kýbogynyń ıegeri atandy. Qos komandanyń lıberolary, óskemendik Mádına Beket pen taldyqorǵandyq Tomırıs Saǵynbaeva da qorǵanysta sátti oınaı bildi.
Endi «Altaı» men «Jetisý» 29 qazan kúni О́skemende sýperkýbok úshin alańǵa qaıta shyǵatyn bolady.
