28 jastaǵy Hasanboı Dýsmatov 2016 jyly Brazılııanyń Rıo-de-Janeıro qalasynda alaýy tutanǵan Olımpııa oıyndarynda bas júldeni oljalady. Ándijan boks mektebi túleginiń óneri kópshilikke unaǵany sonshalyq, oǵan Vel Barker kýbogy tabys etildi. Odan bólek, Dýsmatovtyń álem chempıonaty men Azııa oıyndarynyń kúmis júldegeri, qurlyqtyń eki dúrkin chempıony degen ataqtary taǵy bar. Kazirgi kezde ol kásipqoı rıngte kúsh synasyp júr.
Árıne, bizdiń Sáken Bıbosynov ta osal jigit emes. О́ziniń myqtylyǵyn Ekaterınbýrgtegi álem chempıonaty men Tokıo Olımpıadasynda moıyndatqan qandasymyz qola medaldi moınyna ildi. Desek te, Serbııa astanasyndaǵy jarysty tamashalaǵan maıtalman mamandar men bilikti bapkerlerdiń deni osy jekpe-jektiń favorıti retinde ataǵynan at úrketin ózbek boksshysyn atady.
Bapkerlik kásiptiń jilik-maıyn shaqqan Myrzaǵalı Aıtjanov bul jekpe-jekke óziniń tól shákirtin óte jaqsy daıarlaǵan eken. Boıy men qoly qysqa bolǵanymen, denesi myǵym jáne soqqysy joıqyn Dýsmatovqa qarsy durys taktıka qura bildi. Básekeniń basynan aıaǵyna deıin О́zbekstannyń maqtanyshy shabýyldaýmen boldy. Únemi alǵa umtylyp, judyryǵyn ári de, beri de siltedi. Biraq odan Bıbosynovqa esh qaýip kelgen joq. Ol únemi qarsylasynyń aldyn orap otyrdy. Qajet kezde ashyq aıqastan da tartynǵan joq. Hasanboıdyń soqqylarynyń deni aýa qarmap qaldy. Nátıjesinde, bes tóreshi de jeńisti bizdiń jigitke berdi. Osylaısha, Olımpıada chempıony, Barker kýbogynyń ıegeri degen dardaı ataǵy bar dańqty Hasanboı Dýsmatov qazaqtyń qaısar ulynyń myqtylyǵyn eriksiz moıyndaýǵa májbúr boldy. Kelesi kezeńde Sáken úndistandyq Dıpakpen kúsh synasady.
75 kılo salmaqtaǵy Nurqanat Raıys ta óziniń komandalyq áriptesteriniń jeńisti jolyn jalǵastyrdy. О́ziniń tusaýkeser kezdesýinde ol chernogorııalyq Stefan Savkovıchti san soqtyrdy. Nurqanattyń kelesi qarsylasy – moldovalyq Vlad Gavrılych.
